« 返回前頁列印

即巿股評 | 2020-03-26 13:19

【盤房來料】物管股強勢 留意奧園健康

放大圖片

隔晚美股表現仍然反覆,早段美股一度下跌,至中段扭轉跌勢回升,最多升逾千點,但收市前臨尾香,皆因又再傳出救市方案遇阻,升幅大大收窄,納指更倒跌。至於今日港股同樣反彈,連跌兩日後,今早恒指高開77點,見過23604點超過一星期高位後倒跌,最多跌363點,見過23163點半日低位。其後A股跌幅收窄,港股再度倒升,至中午收市則打回原形。恒指半日報收23527點,無起跌;國指則升18點,報收9548點。

繼美國聯儲局宣布無限量買債之後,歐洲央行亦推相同措施,各國央行以貨幣及財政政策救市,各地股市終穩定落嚟,反彈亦正常。一如阿Man所料,大市喺21000水平已搵到短期底部,反彈浪展開,不過仍然反覆,呢啲時候都係摸石過河,見步行步。

睇番今日重磅股繼續由騰訊(00700)做火車頭,若非騰訊撐起半邊天,銀行股表現咁弱,個市半日又點可以企得定。已經講過騰訊企定定喺375元樓上,反彈會持續,短線喺388元有阻力,過得到就向上挑戰400元。唔少缸邊友都畀大笨象(00005)達8厘嘅年息率吸引,但阿Man已講過息即是凶,大笨象高息率係假象,主要係股價碌咗落山,年息率睇落梗係高。其他藍籌股表現平平,已派成績表嘅瑞聲(02018)今日彈6%,表現最好。

港股反彈唔知可以維持幾耐,暫時大市仲守住10日線(22849)樓上,反彈浪可持續。其實今次受疫情影響而爆發嘅全球性股災,港股表現已唔算最差,有個別板塊一直跑贏大市,講緊嘅係物管股,個別物股管更喺跌市當中持續破頂創新高,強到你唔信。

望住已創新高嘅物管股有畏高症,不妨睇啲已出咗業績,好似奧園健康(03662)日前公布截至2019年12月底至嘅全年業績,年內,集團毛利約為人民幣337.1百萬元,較2018年上升約61.4%。毛利率為37.4%,維持高於平均的水平。2019年,集團淨利潤約人民幣163.1百萬元,按年上升108.3%,權益回報率為33.5%。每股基本盈利為人民幣23.78分,建議派末期股息每股人民幣9.0分。

奧園健康上市一周年,2019年業績表現唔錯,盈利亦見迅速增長,集團繼續鞏固物業管理服務及商業運營服務行業的地位,並對外拓展及優質獨立第三方合作,積極調整並豐富管理組合,提升競爭力。同時運用『健康+科技、健康+生態』嘅創新發展模式,積極發展大健康產業,探索社區養老,健康管理機會。同時積極將服務延伸至康養及醫療美容領域,提升服務能力與品質。未來奧園有能力成為國內領先健康生活服務集團,值得睇高一線。技術走勢方面,成功收復10日線後,目前喺7元水平仍待突破。

麥狄文
(徐狄怡‧證監會持牌人)