« 返回前頁列印

國際財經 | 2019-03-08 18:08

【環宇搜股】歐央行放水搞亂全世界

放大圖片

反應速度比IMF快些少的歐洲央行,去年12月仲劈頭大嗌將加息,但今年第一季都未尾完,行長德拉吉面懵懵跳出來呻,從數據睇歐洲經濟今年唔多掂,計劃9月重新放水,你話咁嘅央行質素,仲邊度靠得住!

為配合德拉吉場大龍鳯,歐央行當然要整色整水,將歐羅區經濟預測由增長1.7%,大劈到只有1.1%,由於預期歐羅區經濟咁慢,德拉吉就有大把理由可重啟TLTRO,即歐洲版的印錢計劃,但表明會在2021年結束,咁你仲信唔信?

歐洲突然開綠燈放水,投資者第一個反應即亢奮,唔理好醜嗱嗱臨响股市埋手,眾志成城搶高下,令歐洲三大指數昨日中段一度拗腰倒升,冷靜過後諗真D,先發現歐洲經濟其實好唔得,所以歐央行才會突然轉軚放水,最終上日歐洲三大指數齊見紅。

歐洲放水質低歐羅,對家美元就多得你唔少,美滙指數應聲挾高,今早一度飆到97.64,美元升當然不利新興市場,連同A股大散,加埋內地出入口數據曳,連累港股今日大跌551點,跌穿20天線(28579點),只靠250天牛熊線(28206點)勉強撐住。

A股暫時撤退為妙

周三本欄建議用A股主攻,但用美股淡倉做盾,不過情況突然變差,變差的意思是指A股,因為歐羅大跌引發美元突抽升,將不利短期人民幣走勢,離岸價由早前6.7兌一美元邊緣,貶到執筆時一度見6.73兌一美元,對人民幣為主的A股當然不利,按現時美滙升勢未完,加上上證指數抽上去三千點大關後企唔穩,今日收2969,失守十天線(3005點),打窒好友條氣,暫時撤退A股,重新再作部署為妙。

至於美股,三大指數連跌四日外,通常先郁中型股羅素2000指數,最近連續三日貼近全日最低位收市,明顯唔多對路,昨晚連標普500指數也跌穿200天鬼佬牛熊線(2750點),大市沽壓應該未完。

手持美股淡倉,現仍值得揸住,首先多隻晶片及雲計算股已率先跪低,標指亦出現圓頂型態,加上標指昨日稍為跌穿鬼佬牛熊線,若再多兩日低過該線,獲利盤將會出現,最終會進一步質低標指。

從技術睇,標指首站料下試50天線,即2666點, 以上日收市價2748,下跌2.7%,隨後不排除會跌到2600邊緣,淡倉可以用十天線作止賺,現處2786點,並續以睇淡標指的3倍槓桿ETF SPXS作睇跌工具。

編按:作者尹德政(Ricky),醉心投資美股近十載,最大滿足感來自尋找抵買有實力的世界行業領袖,每逢周三、五在「信報網站」及「港股360」撰文,另每逢周二在《信報》撰寫「政觀其辯」。

[email protected]