« 返回前頁列印

即巿股評 | 2019-01-07 13:19

【盤房來料】貿易談判及票決脫歐左右魚缸

放大圖片

阿爺上周五事先張揚要好好利用降準工具,話口未完當晚傍晚即宣布降準1%,分階段喺本月15日及25日實行,料可釋放資金1.5億元人仔,扣除即將到期嘅其他放水措施,淨資金投放約8000億元人民幣。受呢個消息刺激,當晚港股喺夜期時段及ADR已再升逾300點,重上25900水平,今早喺新加坡黑期更一度逼近26200點。

恒指今早裂口高開389點,早段曾升417點,見26043點半日高位,其後50日線(25898點)得而復失,升幅一度收窄至138點,低見25764點。恒指中午報收25798點,升172點;國指升75點;半日報收10105點。

查實阿爺放水對股市刺激作用有幾大,缸邊友都心中有數,自2011年11月至今,內地已合共降準12次,易日內地股市上升嘅只有5次,下跌收場係7次,而上周內地公布嘅經濟數據強差人意,人行加大力度放水,以及提早喺過農曆年前一個月放水,某程度係反映內地企業水緊情況甚為嚴重。唔單止人行急急放水穩經濟,一向偏鷹嘅聯儲局主席鮑威爾,之前畀侵侵嘮嘮叨叨咗N咁多次都唔肯讓步,蘋果公司一發盈警,鮑鮑即跪低表示願意聆聽市場聲音,龍頭企業發盈警搞到上周四全球股市插水,聯儲局自然要放一放鴿,亦帶動美股上周五急升。

中美兩大巨頭暫時肯放一放鬆銀根,係為咗中美談判期間為市場buy time,呢幾日中美談判有否進展與達成何種協議,先至係中港美股市成敗嘅關鍵。除咗中美貿易談判之外,要小心米字旗國嘅脫歐協議票決會否驚爆黑天鵝。雖然文翠珊已一再游說國會要通過脫歐協議,但唔少議員都唱反調,更有民調反映愈來愈多人想留歐,米字旗人都係冇嗰樣整嗰樣,2016年明明公投咗要脫歐,家下又想轉軚,一旦需要硬食無協議脫歐,對歐洲股市及滙市定必帶嚟震盪。預計呢一兩個星期,魚缸繼續受消息左右,消息市邊話得埋,總之呢啲市博反彈都係速戰速決,定咗止蝕入場,一有唔對路即跳車咪留戀。

麥狄文

(徐狄怡‧證監會持牌人)