« 返回前頁列印

即巿股評 | 2018-11-01 13:24

【盤房來料】大市回補裂口再向20日線挑戰

放大圖片

美股連續兩日大幅反彈,港股今次都算跟得上,主要係阿爺有心維穩,出完四大天王,再出政策兼呼籲公司回購,A股止跌回升,港股少咗個障礙,自然可以跟番美股彈好啲。恒指今早高開249點,報25228,成功回補10月25日嘅下跌裂口;開市後略為回一回至25190後即又升過,多得A股有得升,恒指亦拍住上。半日恒指最多升484點,高見25463,直指20天線(25551點),中午報收25439點,升460點;國企指數稍為落後,報10307點,升168點。

騰訊(00700)繼續大挾淡倉,半日再升近4.5%,股價高見279.4元,逼近20日線,中午報收279元升12元,早兩日阿Man都提醒咗大家,騰訊股價若然見返265元企穩,淡倉要止賺食糊走人。QQ將會喺今個月14日公布業績,喺業績前炒上,就要小心業績有乜差池,又要再插水。

至於早兩日講過內銀行似乎喺現水平有少少築底跡象,今日內銀股終於似番少少樣,升幅超過1%,內險股方面,唔使諗又係平保(02318)最強,股價已重上75元水平,似乎要做淡唔容易,下次再要開個股淡倉,都係揀番啲弱勢股穩陣。

之前跌到一仆一碌嘅內房股,今日全面急升,有內地專家指最近政治局會議未有再提房地產,相信唔會點再收緊管制,內房股應可鬆一口氣。不過阿Man認為仍有內房股喺手,好趁呢一浪反彈沽得就沽,雖然阿爺點都唔會想畀樓價出現大瀉,搞到民怨四起,但同時亦唔見得會大大力咁放鬆管制,始終樓價持續上升唔係好事,平平穩穩最啱阿爺心水。但內地經濟若然再走下坡,內房股嘅盈利表現肯定都係跟住落。

自從港股踏入熊市之後,阿Man推介得較多嘅係基建鐵路股,皆因為咗穩住經濟,加大力度谷基建係其中一個可行方法。近日國務院辦公廳印發《關於保持基礎設施領域補短板力度的指導意見》,當中表明將聚焦關鍵領域和薄弱環節,保持基礎設施領域補短板力度。再一次證明阿爺要力谷基建嘅決心,相關股份今日全線做好,而當中阿Man最鍾意嘅中鐵(00390)錄得近5%升幅。

講番大市短短兩日由低位彈近一千點,今次又係彈散,抑或繼續反彈路上去努力回補埋25800至26200嘅下跌裂口,暫時阿Man未敢肯定。不過25200點呢個裂口補得倒又企得穩,正常反彈可以持續,不過喺大戶今日幾乎盡殺恒指同騰訊熊證街貨重貨區後,唔排除要喺25600點呢個水平前抖抖或整固,始終殺完一輪淡倉,短線再大力挾上誘因有限。睇番對上幾次,大市反彈至20日線附近,唔係無咗影就要抖抖,即係25500至25600點水平,呢個會係呢兩日嘅休息區或轉折點。

麥狄文

(徐狄怡‧證監會持牌人)