« 返回前頁列印

即巿股評 | 2015-03-17 12:20

【盤房來料】熔盛搵到救星無理由唔炒

放大圖片

內地股市再下一城,上證再升近1%,港股都算唔爭氣,僅升幾十點重上二萬四關口,畢竟24300反彈阻力唔細,加上市場焦點仍然係二三線股,重磅股單靠騰訊(00700)力量有限。

噚日推介超大(00682)果然有料到,下半場升勢一發不可收拾衝破四粒神阻力,今朝當然乘勝追擊,一度高見0.49元,不過0.5元轉角位唔係咁容易突破,或者又係時候整固一下。至於噚日提過要回氣嘅新確科技(01063)跟住阿Man份劇本行,連續第二個交易抖抖氣,不過現水平守得住,又可以搵番個位上車,目標1元仍然未有變,打番個八折見八粒神都收貨。

熔盛重工(01101)復牌公布跟第三方簽收購協議諒解備忘錄,即係阿Man推斷冇錯,「不能倒下的巨人」,總得再搵救星打救。奇怪係今朝U盤高開0.82元竟然無以為繼,上半場仲要倒跌,反映熔盛蟹貨確係多得恐怖。不過阿Man認為搵得白武士出手,熔盛點計條數呢啲位值博率甚高,唔跌穿0.7元可以持貨,博上番100日平均線0.93元。

阿里影業(01060)向住3元目標價進發,有貨唔急要落車,但無貨者急升兩日無謂高追。同屬雙馬概念股嘅華南城(01668),發力追落後急升16%,相對阿里影業有港股通買盤捧場,升完可以再升,而華南城炒作往績係升一日無影,早段炒上靠晒班炒鬼。不過今日首次喺低位突破反彈,斷估今次升勢無咁短癮,至少上番2.6元50日線之上,重上3元則需要多啲時間,但以PE計算現價唔算貴,現價買入仲有得諗。

麥狄文