« 返回前頁列印

即巿股評 | 2015-03-05 12:28

【盤房來料】漢能稱王協鑫追落後

放大圖片

大市繼續調整,指數險守24300點水平,不過淡友要攻破此關難度唔高,加多兩錢肉緊下向屠殺23800-24200之間0既牛仔唔出奇。阿Man絕對唔係睇淡後市,只不過暫未有特別利好消息之下,大市都係炒上落,之前二萬五關屢戰屢敗,調整番一千幾百點正常不過。

缸邊友憧憬兩會有支持新能源行業政策出台,造就漢能(00566)一升再升成為新股王,市值一度超越三千億元,唔少藍籌都要靠邊站。純睇漢能嘅炒作手法,當然只有強國炒家至有咁嘅膽色同實力,愈升愈追貨,仲要係單邊只買唔沽,漢能先有條件喺短短一個月內爆升幾個開。

周一阿Man推介過協鑫孖寶,結果兩股齊齊爆升,升勢有餘未盡,加上漢能升到咁款,應該足夠刺激協鑫孖寶再發力。阿媽保利協鑫(03800)啱啱發盈喜,升穿100日線後順利成章向250天線2.4元水平進發。阿仔協鑫新能源(00451)由七毫幾整固完成再起步,能重上1元水平反映之前蟹貨收集得七七八八,貨源再入強中手。聽講協鑫新能源又係由強國人操刀,現價計再炒高多一個開亦不過二百幾億市值,相對漢能近三千億市值十分一唔到。以業務實力比較,兩者質素唔係差得遠,協鑫呢個價可以話cheap到嘔,論值博率阿Man梗買451。至於另一當炒太陽能股君陽(00397),噚日0.15元起步炒高五成至現價0.225元,講到市值呢隻確係蚊型晒士,10億cap唔夠,但以業務質素以言,遠遠不及協鑫同漢能,相差幾十班完全無得比。不過純炒作唔睇基本因素,君陽確係吸引到炒鬼。

麥狄文