熱門:

2018年11月8日 港股直擊 即巿股評

【輪證贏家】老散的心態

噚日上半場確係頂唔順,先將隻平安Put(28218)斬纜,留返隻(12648)同佢死過。但去到下晝出去食飯時,見到下半場一個市就繼續飆到上升逾400點,心諗:就當今次將之前恒指熊搵落嘅回吐少少出嚟啦,反正鋪鋪都係咁架啦,大不了之後嗰幾個星期好似肥媽同陸浩咁食平DDD啦。

到我返到公司,大約1點45分到啦,恒指倒跌過百點;轉睇平保個價都已經跟住個市變返紅色,5分鐘圖見喺1點45至2點5分呢段時間SlowSTC(14,3)回落到超賣水平,而平安Put(12648)當時高低位做過$0.405/$0.395,平均數就$0.4;過多陣仲升多幾格,高見$0.42添。

雖則呢個位同買入價差唔多,算叫做輸少當贏嗰隻,但係見平保日線圖確有到頂之嫌,呢一下繼續揸貨絕對係本着老散心有不甘嘅心態(真係唔好學,純粹係因為細注而可以任性)。最後,今朝起身見到嗰條升逾500點嘅美股,同嗰個預示港股升3XX點嘅ADR,令我唔想趕落樓下搭巴士返工,兼好想親口同老細講一句:我sick leave。

正所謂輸人不輸陣,反正噚日死都唔沽,就預咗有壯烈犧牲嘅準備;抱住輕輕鬆鬆鄧梓峰嘅心態返工,埋到位第一件事開返啲電腦同電視先,之後就一個箭步拎住我個杯同水樽去pantry洗(順便洗埋同事個水樽,因為佢已經成個月都返唔到工,怕佢個水樽發霉),完成後再返埋位,電視同電腦都開到啦,一睇恒指粒數,「乜升得百零點咋?」,再睇睇平保,由今朝$80蚊落返去$79.X呢啲水位,千祈唔好興住,因為(12648)輪價得返$0.395/$0.385,對比前日買入價$0.44,輸咗一成有多。

原本平保升穿$80嘅話,suppose咩都唔理就將所有嘅put輪cut loss,但當見到依家10點22分時,等咗兩日嘅平保日線圖SlowSTC(14,3)%K線(89.375)約於跌穿條%D線(90.067),再望現價做緊$79.25,同時今日係第五日頂穿咗條保歷加通道頂部,抱住一個打不死老散心態,(12648)當然有理由繼續持有啦。

而真實嘅情況係:(12648)仲喺度(由頭到尾我都只係一個老散),不過要小心嘅係上方熊證26500至26599點呢度有900張期指,其實同現價(10點43分mark低嘅26349點)只係爭250點就可以食晒;重點係再上多100點嘅話,就食到重貨26000至26699點嗰1314張期指,咁重貨確難可以「1314」(一生一世),兼且下方牛證最最貼價都講緊係25100至25199點,同現價爭成千點。萬一個市失心瘋向上殺熊(我唔理佢用咩理由呀!)再硬頸嘅老散都有屈服嘅一日。

感謝大家陪我/睇住我今鋪硬仗!

作者阿珊,從事財經及投資版報道超過10年,由平面媒體走到網絡世界,《鐘擺戰略贏港股》作者。相信技術分析,由窩輪到牛熊證無一不炒,唔貪心,志在搵餐下午茶。

電郵:[email protected];Weibo(下半part):#Gladyshan#

放大圖片

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads