熱門:

2018年10月29日 即巿股評 港股直擊

【輪證贏家】高槓桿恒指熊射殺近牛

上個星期被同事傳染完之後,周末又爆瞓兩日,今日終於可以甩罩,但換來嘅係到我後面位同事帶罩呢,次次轉天氣都係咁,個個輪住病。

上個星期五(10月26日)睇唔到條恒指想點,唯有從個股入手,最後就睇中咗隻殘到幾乎無得再殘嘅滙豐控股(00005)出嚟,小注入滙豐Call(11302),按朝早10點20分至11點50分,喺5分鐘圖上SlowSTC(14,3)都係超賣水平,用返平時計開嘅平均買入價嘅方法,即按呢段時間(11302)高低位為$0.163/$0.152,平均數為$0.1575作為買入價計,去到下晝2點半鬆啲就已經有4.8%賺幅;喺【下半part】都有講到,如果係大注嘅話就早應收割,但如果係小注嘅話就可以過周末。

今朝恒指開市1238點,報24955點;而滙控就升0.6%,開市報$60.85。依家9點55分,恒指升幅一度收窄到得幾十點,不過今次我哋要睇嘅係滙控嘛,依家滙控升1.3%,做緊$61.3。拆5分鐘圖見SlowSTC(14,3)就嚟上到嚴重超買水平,呢個時候(11302)做緊$0.180,對比此前計嘅平均買入價$0.1575,賺幅有14.3%,今晚又可以加餸啦。

依家10點2分,約好班舊同事今個星期六落觀塘打邊爐之後,再load埋個恒指牛熊證街貨圖,就見到下方牛證最貼價嘅24500至24599點,呢度有相當於869張期指,係就係未過千張,不過勝在同現價(10點4分@24712點)差212點咁大把,講緊係只用212點就可以食得晒呢堆貨,而唔係行到去門口咋。至於上方熊證最貼價25300至25399點,呢度嗰590張期指係全新嘅,但同現價比就係升687點先可以食得晒。恒指熊(61662),收回價25538點,同現價有逾700點距離,喺255XX點收回價中,以約28.8倍槓桿排行最高。

依家10點12分,戰友Jack WhatsApp我話恒指倒跌,望望電視見到報跌16點,開恒指5分鐘雨圖見依家SlowSTC(14,3)跌到落超買水平,想再入恒指熊嘅可能要等一等;同一時間,戰友Jack同我講佢已經同戰友太太plan去旅行,不過係講緊2020年先去嘅旅行(而由依家到2020年期間嘅旅行佢哋一早plan好啦),plan得咁有計劃嘅,我識嘅朋友之中佢都算係排頭位啦。

作者阿珊,從事財經及投資版報道超過10年,由平面媒體走到網絡世界,《鐘擺戰略贏港股》作者。相信技術分析,由窩輪到牛熊證無一不炒,唔貪心,志在搵餐下午茶。

電郵:[email protected];Weibo(下半part):#Gladyshan#

放大圖片

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads