噚日揀咗隻恒指熊(61376)出嚟，喺朝早11點5分同11點45分，SlowSTC(14,3)出現超買，呢兩個時間(61376)高低位分別做過$0.085/$0.082同$0.083/$0.08，平均數就係$0.0835同$0.0815。呢兩個位是但一個位買嘅話，揸到下半場1點30分，恒指5分鐘圖SlowSTC(14,3)由此前嘅超買火速回落到超賣水平，至到下晝2點你都仲可以day trade到隻(61376)，又按呢段時間(61376)高位低$0.091/$0.083計，平均數為$0.087，對比返此前兩個買入價，前後兩個零鐘鬆啲，賺幅分別有4.2%同6.7%，又一個下午茶落袋。
若然嫌呢個賺幅唔夠嘅話，嘿嘿，我估喺個市未見跌過百點時都嚇餐死，先係今朝起身見到新聞報噚晚美股報復式反彈升400幾點，再見今朝早日經都有百幾點嘅升幅，留意返(61376)噚日揀出嚟嗰時係全場最貼價嘅熊證，喺咁高槓桿嘅情況下就算個市郁少少，證價都會有明顯嘅變化。
依家9點56分，恒指跌緊41點，報24952點，5分鐘圖上見今朝跌過百點，即係9點50分時，分鐘圖上嘅SlowSTC(14,3)係就係由高位回落，但回到落呢個位只係中軸水平，跟手二話不說就作勢起彈，見恒指由跌過百點至依家跌幾十點就知點解啦。過多5分鐘，恒指由今朝升轉跌再跌轉升，睇嚟今日星期五個市都係悶悶地過咗去就算；大不了下個星期二(10月30日)期結同期日前拿拿聲補咗噚日個下跌裂口(25194至24994點)，跟住11月開局第一波就視乎乎11月6日個美國中期選舉搞成點先知。
恒指今日吽逗，就試吓從個股著手，呢期大家關心嘅似乎係滙豐控股(00005)喺$60血肉長城，日線圖見滙控今日喺保歷加通道底($60.342)微微跳起兼暫呈「十字星」，下方SlowSTC(14,3)%K線(4.077)仍然低走於%D線(4.602)，但呢兩個數值反映出滙控再跌嘅空間有限；就算SlowSTC(14,3)要超賣再超賣，DMI嘅-DI都已經由高位耷低個頭，準備同下方嘅+DI會合；仲有14天RSI見19.779，雖然無話期望下個星期一(29日)佢份季績有幾標青，不過技術性反彈一下都真係在所難免。
滙豐Call(11302)，行使價65元，睇啱嘅唔係成交大，而係約11倍槓桿屬偏高，且約23.89%引伸屬適中偏低。
作者阿珊，從事財經及投資版報道超過10年，由平面媒體走到網絡世界，《鐘擺戰略贏港股》作者。相信技術分析，由窩輪到牛熊證無一不炒，唔貪心，志在搵餐下午茶。
電郵：[email protected]；Weibo(下半part)：#Gladyshan#
