個幾星期前，美股道指曾出現單日大插800點嘅慘況，當晚阿Man曾經喺社交平台專頁表示，發文美股處於終點的起點，「the beginning of the end」，其後美股表現反覆，直至隔晚三大指數終於大幅跌穿250日線，只要三日內唔能夠收復呢條傳統牛熊分界線，美股亦成為全球最後一個步入熊市嘅市場，環球股市全面入熊，相信嚟緊嘅日子，大型震盪會陸續有嚟。
港股早喺六月已現熊蹤，當時阿Man亦已建議趁高位減磅，甚至完全零持，若然閣下今日手上仍有蟹貨，唔好意思都要講句，咪以為現價輸咗三成四，諗住坐番上去，港股仍會以一浪低於一浪形態，持續向下尋底，今日唔肯走，諗住等反彈，就好似早兩日大市彈到上26200水平，又諗住等一等輸少啲，結果今日乜嘢環境，大家有目共睹。
講番個市今日恒指開483點，開市隨即急瀉595點，見24653點創近18個月低。其後跌勢略為收歛，跌幅曾收窄至394點，見24855點半日高位。恒指中午收報24794點，跌455點；而盤中失失守一萬大關嘅國指，中午則報10051點，挫175點。
大笨象(00005)喺下周派成績表前，股價每況愈下，今日跟友邦(01299)齊齊創近兩年低位，前者跌1.5%，後者則跌2.8%。值得留意係大笨象暫時好似喺60元水平頂得兩吓頭鎚，但之前阿Man講咗，65元失守，見62元係最低消費，62元都穿埋，要有心理準備股價可見55元至58元。至於友邦已失59元100周線，下一個支持位可能喺去年四月橫行區54元至55元，仲有貨真係自己睇路。
其他藍籌股大部份跌到一仆一碌，隔晚納指跌得最傷，並創下八年以嚟最大單日跌幅，香港呢邊嘅科技股當然要陪葬，騰訊(00700)半日跌3%，半日低位265元跟上次低位相約，咪以為呢個位好穩陣，反而260元至265元係騰訊牛牛街貨重貨區，大戶又豈會放過呢一堆肥牛。其他科技股當然要捱沽，之前有人疑質阿Man沽做淡舜宇(02382)，結果舜宇彈咗個幾星期，但呢個星期已蒸發全部反彈升幅，半日再跌7.6%，70元呢個位失守係遲早問題。至於其他科網股都唔使諗，全線大飲茶。預期估值美國高昂嘅科技股，將會追回跌幅，而香港呢邊嘅科技股亦冇運行，連博反彈都唔使諗，好易偷雞唔倒蝕執米。
今日大市跌勢相當全面，由於美股走勢凶險，而A股亦未見起色，至於說好的國家隊救市點解無咗影，大家可以喺本人嘅Facebook專頁搵到答案。留意番今日盤中即使低位有反彈，估計去到24900水平都差不多，一旦今晩美股踩多腳，大市喺下周期指結算前將再見低。
麥狄文
(徐狄怡‧證監會持牌人)
