噚日輸半隻恒指牛(69936)唔緊要，但見住個市係咁無底式向下插，將前日(10月22日)嘅升幅全數抵消都唔夠，仲要跌凸，又一次人踩人嘅跌市即日追跌亦唔係上策，所以噚日下半場選擇做個花生友就算。
今朝晨早起身第一件事就上港交所(00388)個website download份牛熊證嘅list用嚟學計街貨，邊個教我計？咪就係輪商朋友Dick囉，一個咁好嘅學習機會就梗係要好好把握啦(雖則其實大家一開商輪啲website> 牛熊證街貨圖就已經有晒所有最新嘅data)，搞完一大餐出得門口，市都開lu；落巴士時恒指剛好完咗U盤，恒指升55點，開市報25401點。至依家9點48分，恒指升幅曾一度擴大，不過依家就升21點，做緊25368點。
噚日深插殺死唔少牛證，今日再開恒指牛熊證街貨圖睇，25300至25399點就係牛證第一貼價區，呢度有相當於196張期指，不過按今日暫時做過低位25239點計，呢196張期指已經成為大戶嘅早餐；再落就係25200至25299點，呢度就有成924張期指，當中有850張係噚日新增嘅，換言之大家都見噚日大市深插過後會有反彈(而日線圖目前見恒指係呈「十字星」嘅)。
重貨區就仍然係25000至25099點，呢度有相當於1933張期指，同現價比都只係爭300零點，如果用呢兩日恒指做出嚟嘅點數去衡量嘅話，唔算遠架啦。至於上方熊證，最貼價嘅係26000至26099點，呢度451張期指全數都係新增嘅，擺明見市跌就追跌而入啦，無話啱唔啱嘅，各人有各有嘅策略啫。
唔知大家有無印象喺9月中時用由上年年初至依家畫咗個Fibonnacci出嚟？當時恒指都仲有27XXX點，但依家25XXX點計，即係穿咗0.382(26315點)水平，假如呢條「下降通道」仲唔停，而且仲要繼續向下衝同放大路線圖嘅話，好有可能會見0.236(24621點)水平；BTW，星期一恒指奮力一彈，最高位都只係見26234點，即係被條0.382頂住個頂。依家10點28分，幫part time同事追返啲兩個星期前嘅單之後再睇返個市，都係無乜點變(幾驚自己會miss咗啲嘢)，恒指熊(61179)，收回價25938點，同現價有逾600點差距，約33倍槓桿屬偏高水平，吼準見分鐘圖超買就落場，目標指向25000至25099點嗰堆重貨先啦。
作者阿珊，從事財經及投資版報道超過10年，由平面媒體走到網絡世界，《鐘擺戰略贏港股》作者。相信技術分析，由窩輪到牛熊證無一不炒，唔貪心，志在搵餐下午茶。
電郵：[email protected]；Weibo(下半part)：#Gladyshan#
