噚日特首林鄭宣讀佢任內第二份《施政報告》，但喺佢乜都未講之前，【輪證贏家】揀咗隻恒指牛(65233)出嚟，諗住博轉勢，但勢估唔到呢兩件事竟然有個微妙嘅關係。拆開恒指5分鐘圖睇，搭正11點就見到SlowSTC(14,3)跌到落超賣，承如今朝所揀嘅恒指牛(65233)同埋策略，呢個時候就係將(65233)落場嘅好時機，而呢個時間正正就係林鄭開始宣讀份《施政報告》。由呢刻開始直至到11點45分，林鄭一路讀，條5分鐘嘅SlowSTC(14,3)就一路keep住喺超賣水平，呢段時間(65233)高低位做過$0.039/$0.031，平均數$0.035，就當呢個係平均買入價。
去到下半場1點20分至1點50分呢個時間，可能大家都消化完份《施政報告》覺得無乜料到，個市又上返去，呢個時候5分鐘圖上嘅SlowSTC(14,3)由此前嘅超賣彈返上去超買，按照一貫策略，(65233)應該可以收網，呢段時間(65233)嘅高位低係$0.052/$0.048，平均數$0.05，用呢個作為賣出價嘅話，對比頭先計個平均買入價$0.035，火速袋15格，計一計，woo，42.9%呀，咩仇都報晒啦。
噚日喺【下半part】度講Day trade隻(65233)就此結束，再睇返恒指噚日下晝日線圖變咗「十字星」，有估過佢可能又「待變」，於是收割咗隻牛仔之後就再無理過個市，等收工就算。
今朝一起身，就見到message話道指跌800點，今朝日本已經跟足，依家9點56分都港股跟足，恒指做緊25330點，跌866點，而大家最關心嘅都真係隻騰訊(00700)。
認真，佢計埋今日都10連跌，呢段期間我對佢真係隻字不提，因為身邊有唔少朋友因為呢隻企鵝而輸到high high，但噚日就同戰友Jack輕輕討論過一下，就係用Fibonnacci計咗條數出嚟。Whatsapp原文照copy如下：
我：
用Fibonnacci去畫嘅話
拉 21/3/2018 DH 475.6
同 23/12/2016 DL 179.6 計
0.618 > 362.528
0.5 > 327.6
0.382 > 292.672
0.236 > 249.456
依家0.382都穿埋 >> 下一站唔通真係 $250???
Jack：唔係呱...佢咁個市好難彈架喎...
依家10點10分，剛剛用完小畫家畫好個騰訊Fibonnacci出嚟，恒指跌幅仍然係800幾點，做緊253XX點水平，而騰訊就爬返上去$270.2，跌5.66%或$16.2，呢一插我諗已經幫咗本身中刀嘅人，將把刀再插入啲(如果真係咁而要救人嘅話，就真係唔好「抆」返把刀出嚟鄉←個「抆」字動用我TEAM同事無人知道個正點寫，是但啦，我諗大家明我講咩嘅！哈哈！)(編按：掹)，大家見到個圖我諗都估到今日點解條題係「騰訊恐見$250」啦。
依家10點18分，恒指最低做過25226點，坊間大多數嘅牛熊證街貨圖係同現價距隔1000點架啫，但係有一間default係比1500點，每層100點比你睇嘅，咁大家就可以再睇多啲啦。最貼價嘅牛證街貨係25200至25299點，呢度有相當於133張期指，重貨又係喺大關口位，即25000至25099點，但講緊都只係得279張期指。上方熊證就算輪商幾咁努力都好，大裂口800點咁挫落去，點出都出唔砌啲貼價熊，所以最貼價嘅都只係26900至26999點，同現價(10點23分報25389點)比，唔好話要食，講緊踩到去門口都要1511點先得。
如果要個市繼續插落去嘅話，重磅藍籌自然唔少得，換言之騰訊再出現「人踩人」嘅事件一啲都唔出奇，睇埋騰訊牛熊證街貨，牛證$280至$289.8，同$270至$279.8今早全數死亡，最貼價就係$260至$269.8，呢度有相當於6.3萬幾期指，重貨嚟架啦。至於上方熊證第一梯隊講緊係$310至$319.8，同現價$270.2比，要騰訊上$39.8先入到門口。
博大升就真係唔好啦，事關噚日美股都專吼啲科技股嚟插，啲錢入晒去避險(係避世先啱)，但技術性反彈都仲可以嘅，事關今日恒指同騰訊(或者仲有其他跌得深痛嘅個股)穿咗保歷加通道底，依家得兩條路行，一就係條保歷加通道口拓闊，同時個價唔好郁住，等保歷加個底擘大到仲低過依家恒指/騰訊個低(咁就真係有位再位比佢跌到high high)；第二條路就係技術性反彈，彈返入保歷加通道底裏面。如果呢兩個假設係合理嘅話，咁就有兩個做法：一，咩都唔好買，等個價瓹返入保歷加通道裡面先再嚟過；二，吼5分鐘圖見超賣就開恒指牛(65157)，收回價24650點，同現價有逾700點差距，30倍槓桿報到仇。
你問我揀邊個？我會揀一，即係乜都唔做，事關小妹返埋今日就放大假，去到10月22日先返，呢段時就同我家老爺把臂同遊日本，【輪證贏家】同【下半part】亦暫停營業，多謝各位。
作者阿珊，從事財經及投資版報道超過10年，由平面媒體走到網絡世界，《鐘擺戰略贏港股》作者。相信技術分析，由窩輪到牛熊證無一不炒，唔貪心，志在搵餐下午茶。
電郵：[email protected]；Weibo(下半part)：#Gladyshan#
