噚日揀嘅恒指Put(27137)如果喺朝早10點20分時見到恒指跌幅收窄嗰下,5分鐘圖上SlowSTC(14,3)升至70附近水平時落場嘅話,喺下晝2點幾時(27137)做過0.166附近水平,(27137)都執到10格8格,夠買多兩盒月餅啦;不過喺<下半part>時有講過恒指Put/熊好喺噚日收手啦,事關見到個市都踩住咗條保歷加通道底,保歷加通道未見有拓闊現象,估計個市有會係出現一個調整/小型反彈,務求將粒燭屈返入保歷加通道裏面先。
今朝喺屋企食緊麥皮時,睇電視見日經跌逾200,心裏面隻魔鬼就諗:唔係掛?放走晒啲Pur/熊仔你同我講仲跌?但兩秒唔夠天使就是咗出嚟話:嗱!唔得咁樣架!賺咗錢落咗袋就係落咗袋,有早知就無乞兒,有錢賺唔好咁樣怨呀,心態唔好呀。當然,最後梗係碗麥皮戰勝一切啦,人係會肚餓的。
返到公司見到個電視頂出咗條橫簽:恒指低開78點...都無理得咁多,走去pantry斟完杯水之後返嚟覆埋一堆email,依家10點33分,見到恒指已經由跌轉升,做緊27006點,升31點,再睇返個圖,原來一度倒升過220點。就用呢個點數計數,恒指牛熊證街貨圖上見下方牛證最貼價嘅係26800至26899點,呢度有相當於688張期指,同現價比就相差206點;至於上方熊證,最貼價就係27900至27999點,呢度有相於400張期指,同現價比嘅話就爭993點,似乎都係下行近啲喎。
如果畫返條「中期下降通道」出嚟嘅話,其實恒指由此前8月底嘅高位28579點至28533點呢度,掂到「中期下降通道」之後,至今就回落,形態上就是彈珠咁撞返到接近個「中期下降通道」底先停,而依家睇日線圖上見就仲未掂到個「中期下降通道」底,恒指熊(61015),收回價27948點,成交活躍又安全,但考慮到今晚中美貿易戰第二波有不穩定因素出現,做到day trade就day trade啦,做唔到就唔好入市啦!
作者阿珊,從事財經及投資版報道超過10年,由平面媒體走到網絡世界,《鐘擺戰略贏港股》作者。相信技術分析,由窩輪到牛熊證無一不炒,唔貪心,志在搵餐下午茶。
電郵:[email protected];Weibo:#Gladyshan#