噚日喺下半part計恒指Put(26085)如果喺揸到2點30分嘅話已食咗17格或18.3%;但估唔到之後恒指再向下殺,全日收市跌700幾點,(26085)全日收報$0.166,對比噚日計嘅買入價$0.13175計,賺幅達26%,唔止可以買到一盒散裝嘅冰皮月餅,相信應該都真係夠買盒八星伴月返屋企,同屋企人準備賀中秋。
剛剛同中電嘅Marketing小姐Don(好正,佢個名同我都係一樣,我哋只係姓氏唔同,所以份外親切)講完電話之後,依家10點15分,恒指今朝早低開174點,開市報27069點,呢一下嘅下挫已經將牛證頭三part嘅街貨全數食晒(27000至27099點裏面就應該仲有69點未死嘅,但醫番都無用啦),呢度夾埋有1541張期指,早餐嚟講佢嘅胃口都真係唔細,但咁樣向下一挫之後,恒指之後曾經一度回升,跟手又再跌過,到依家10點20分,恒指只係微跌38點,做緊27206點。
開日線圖睇,恒指依家處於五條平均線之下,換保歷加通道出嚟,就見到恒指噚日嗰支大陰燭一插,幾乎將條保歷加下降通道填黑咗一格咁滯,所以今日恒指處於挨近保歷加通道底(26981點),至於SlowSTC(14,3)%K線有觸底之嫌,如是者後市即係返條%D線繼續下行,%K線就變成準備兜底向上,暗示一輪下行嘅路線即將告終。
「即set 12係兜底Call返上去?」下行告終之後嘅回升就唔一定係轉勢嘅,可能只係跌得太深之後嘅調整啫,而今日恒指止跌之後作調整而反彈嘅機會亦都係高嘅。第一,日線圖上都挨近保歷加通道底囉,最多咪插穿多一兩日,但之後始終都要走返入保歷加通道裏面,而觀乎依家條保歷加通道無乜斜度,即係暫時嚟講未有位比位個市落。
再睇埋恒指牛熊證街貨圖,頭先計過當埋27000至27099點全數死亡嘅話,咁即係26900至26999點呢度就係最貼價嘅街貨,呢度有221張期指;可能你覺得好少,事關呢期個市胃口真係好大,但再落多100點,即26800至26899點嘅話,呢度就有1116張期指等緊你。
當呢個走勢圖再加牛熊證街貨圖之後,再預測個路線圖,你話似唔似跌得深得滯先回一回氣,然後再插過?用咩藉口插?求其話林鄭感冒>市場擔心香港經濟受影響>恒指下挫都得啦,藉口一啲都唔重要,重要嘅係結果。恒指Put(27137),行使價26800點,1%輕微價外,等5分鐘圖見超買先小注入場。
作者阿珊,從事財經及投資版報道超過10年,由平面媒體走到網絡世界,《鐘擺戰略贏港股》作者。相信技術分析,由窩輪到牛熊證無一不炒,唔貪心,志在搵餐下午茶。
電郵:[email protected];Weibo:#Gladyshan