今朝一早就返到公司，不過到依家10點23分，啱啱先搞掂套push system，一陣仲要試，所以就拿拿聲趁段時間睇吓個市(重點係交稿)！
噚日就執咗隻恒指Put(26085)出嚟，喺朝早9點50分、下晝1點40分同2點20分，都見到恒指5分鐘圖SlowSTC(14,3)出現超買，第一個時間9點50分唔計啦，唔好話份稿，連睇市都未睇真，用之後嗰兩個時間作為買入時間啦。喺下午1點40分時(26085)高低位做緊($0.134/$0.133)，平均數就係$0.1335，而2點20分就見到輪價報$0.13，再將呢兩個數拉個平均數呢，就係$0.13175，呢個就當作為買入價啦(粒數根本就唔會咁複雜)。
「使乜咁複雜，今朝早恒指都見紅啦，(26085)收網啦！」都係嘅，不過計吓個賺幅令自己開心吓啫。恒指今朝低開184點，開市報27789點；依家10點40分，恒指跌幅擴大至跌298點，做緊27676點。拆開恒指5分鐘圖睇，見恒指由今朝9點55分至10點25分，呢段時間嘅SlowSTC(14,3)兩線都返個位數，呢個時候就係(26082)收網嘅靚位，呢段時間(26085)高低位($0.144/$0.140)嘅平均數$0.142計，賺幅有8%，夠買一盒散裝迷你冰皮嘅。
有無計由一盒散裝迷你冰皮變成一盒八星伴月先？開恒指牛熊證街貨圖睇吓個故事嘅下集囉。依家10點53分(個system好番啦，可以專心啲啦)，恒指做緊27612點，跌361點，最低暫時見過27582點，呢個位呢講呢，其實即係踩咗入最貼價嘅牛證範圍(27500至27599點)，而呢度有相於891期指，再向下望見到牛證第二至第五層每層街貨都有400幾至600幾張期指喺度；至於上方熊證又唔係話無貨嘅，最貼價嘅27900至27999點得201張期指，要比多100點，即28000至28099點呢度先有618張期指，咁秤就梗係下行殺牛著數啦，反正再睇返日線圖見恒指仍受制於10天線(27869點)之下，下方技術指標繼續發出看淡訊號。恒指熊(59878)，收回價28288點，同一收回價中槓桿最高，小注博博八星伴月返嚟先！
作者阿珊，從事財經及投資版報道超過10年，由平面媒體走到網絡世界，《鐘擺戰略贏港股》作者。相信技術分析，由窩輪到牛熊證無一不炒，唔貪心，志在搵餐下午茶。
電郵：[email protected]；Weibo：#Gladyshan#
