熱門:

2018年8月3日 即巿股評 港股直擊

【盤房來料】人民幣未穩 中港股市冇運行

港股噚日經過一輪急挫後,今日算係穩定落嚟,可惜港股市底弱,內地股市市底更弱,弱弱得跌,又係一個陰乾嘅上午。隔晚美股先低後高,蘋果公司再破頂創新高,成為美股歷史上首間突破一萬億美元嘅超級巨企,帶動納指跟標指上升,唔少科技股亦反彈。而隔晚夜期跟ADR亦見反彈,可惜今日上半場港股低開後,彈力相當有限,可能係周末前夕,缸邊友唔多願入場博命。

恒指今早略為高開37點報27751,彈到最高都只係見27786點,但喺內地股市早段腳軟之下,大市掉頭回落,最低見27604,跌110點。其後A股股回升,港股跌幅收窄,恒指中午收報27679點,跌35點;國企指數中午收報10687點,跌45點。A股彈唔起,港股跟動彈不得,主要係人民幣又再下跌,已跌至6.88至6.89水平。一旦人仔跌穿7算關口,沽壓會大增,屆時阿Man唔敢想像中港兩地股市有幾大鑊。

騰訊(00700)連跌六日後終見反彈,半日反彈1.6%,為恒指貢獻43點,亦係半日升幅最大藍籌,其他藍籌重磅股個別發展。至於阿Man已警告唔值博嘅濠賭股,公布7月賭收之前係威係勢,公布之後死咁半截,今早沽壓未除,仍然被掟到隻狗咁。而永利澳門(01128)業績遜預期,又被大行調低目標價,股價噚日急挫近一成後,今日半日再跌2.4%。銀娛(00027)、金沙(01928)跟澳博等全部跌逾2%,美高梅(02282)則逆市上升。

自6月中開始阿Man都有提過,醫藥股累積升幅巨大,一旦有資金要撤走,好大機會成為魚缸提款機,跟手仲爆出黑心疫苗事件,令醫藥股雪上加霜。今日醫藥股沽壓顯著,早兩日上市嘅歌禮製藥(01672),半日跌逾一成,其他醫藥股閒閒地跌3%或以上。受阿爺再收緊房屋政策,以及人民幣貶值所影響,內房股繼續捱股,幸而阿Man早已呼籲大家,內房股要避之則吉,相信無乜人會中伏。

眼見中國喺貿易戰上苦無對策,除咗死剩把口話會還拖,似乎只得人民幣貶值一招,至少口痕友話大不了狂掟美債,同美國齊齊攬炒,阿Man認為機會不大。皆因中國所持美債數量唔少,除非將之全數沽出,否則沽些少美債質低美債價靠嚇,最終辛苦嘅又係自己。

雖然港股由29200點回落至昨日低位27500點,累計跌幅已達1700點,但係反彈仍欠動力,只不過現水平28600左右,正正係由18179點延申至今年1月高低33500點升浪,黃金比回調0.382,27648點,現水平即使唔反彈亦會有啲支持。只係呢個支持一旦失守再下跌,以黃金比0.5計算,下一個位要見25839點。跟現價仍有千九幾二千點距離,睇落都幾恐怖。今個月開局,恒指高位係28756點,以近月多次港股回調幅度約一成或三千點先識停車嚟計,再失守噚日低位的話,加多一兩個負面消息,今次跌浪確有機會低見25881點或25759點,亦相當接近25839呢個0.5黃金比。至於今個月見唔見倒呢個位,阿Man唔多肯定,總之人民幣未回穩,中港兩地股市繼續無運行。

麥狄文
(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads