熱門:

2018年6月22日 即巿股評 港股直擊

【盤房來料】認購小米新股 不如買小米手機

貿易戰拳來拳往,美國已下定決心要打呢場硬仗,至於中國幾時還拖,暫時未知,不過呢個問題繼續困擾環球股市走勢,隔晚美股三大指數均見下挫。至於港股亦一度逼近二萬九邊沿,恒指跌破29500至32000點移動區間底部之後,今日進一步失守250日線(約29295),即使超賣後反彈,港股短期難言轉勢,弱勢已成,暫未宜撈底。雖然恒指累積下跌逾2000點後,隨時可出現報復式反彈,只係恒指一直喺29800之下,短期好難再向上玩。即使見反彈亦不過有波幅而冇升幅。

恒指低開80點,失250天線,開市一度跌206點,低見29089點,2月底位失守後,暫守二萬九大關,上半場表現反覆,雖然曾反彈至29302點半日高位,可惜未能企穩250天線,恒指中午仍要跌78點,收報29217點;國企指數報11304點,跌60點或0.5%。A股連失多個重要支持後,今日先低後高叫做彈一彈,可惜相對累積跌幅,明顯彈力有限,始終半年結前後內地資金緊掘,未能水到渠成,A股暫難扭轉弱勢。

港交所(00388)表現確令人失望,首隻同股不同權股份小米(01810)快要招股,預計下月9日登場,入場費約4444元,死死死死真係唔多吉利,迷信嘅缸邊友話唔認購亦無蝕底。小米申請CDR上市,中證監以萬言書超過80條問題去招乎小米,生怕小米上市後累內地股民賠錢,相信港交所呢邊卻以光速時間審批其IPO申請,唔通港交所完全唔擔心小米累香港股民輸錢。同一間公司,中港兩地申請上市卻不同待遇,中港兩地證監會,確具「一國兩制」特色。雖然小米唔少星級基石投資者,但一間以產銷手機為主嘅公司,超過50倍PE估值又真貴咗啲,要阿Man去認購,倒不如拎嗰四千幾蚊去買幾部小米手機仲實際。

碧桂園服務有得諗

息口節節上升,本來係利好金融股,偏偏金融股尤其內銀股呢期唔夠精神,四大行續跌,暫時仲未搵到個可靠嘅底部。阿Man噚日講咗大市反彈至29900點前行人止步,午後再度急插,今日再回落至二萬九邊見反彈,可惜彈力亦只係一般。不過炒股唔炒市,阿Man認為新股碧桂園服務(06098)絕對有得諗,除咗其業績增長理想,股價亦見回理之外,難得新股登場蟹貨有限。只要有心人掃至貨源更歸邊。碧桂園服務仍可破頂再破頂,現價標先睇12.5,股價失守9元才止蝕離場。

麥狄文
(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads