噚日話個市擔心意大利有事,一嚟就裂口低開,前日臨收市先買嘅恒指熊(64350)就係咁就走人,之後個市雖然有再插多啲,仲穿過30000點添,但到下半場見個市好似等4點收工咁,所以下半場我都無乜點睇到個市,至收市見到個點數都好似同我食完飯返嚟咁上下,諗到諗到係悶局。
今朝早起身睇電視就話意大利個邊無事啦,呢啲政局/政治問題其實好似男女朋友咁,嬲你一晚就算啦,第二日又糖黐豆,你見今朝恒指又彈返上去就知啦。如果從技術層面去解釋嘅話,咪就係噚日所講恒指現水平處於短嘅「下降通道」同條長嘅「暗斜上升通道」兩條「通道」嘅底之上,觸到底通常都有力彈一彈嘅;麻煩就麻煩在於下方啲技術指標勢頭仍然向下,SlowSTC(14,3)咁鬼感敏都未屈返向上就知啦,即係反映市仍然偏淡為主, 依家10點29分,或者恒指暫見高開低收就係咁嘅原因。
睇睇恒指牛熊證街貨圖依家咩境況先。上方熊證見噚日個市跌得就跌,咁就梗係走得嘅走啦。最貼價熊證街貨就係30600至30699點,呢度有522張期指,全數都係噚日新增嘅街貨,用依家10點31分恒指現價30222點計,如果現價反彈477點先可以食得到呢堆街貨。
至於下方嘅牛證街貨,最貼價就係29900至29999點,呢度有576張期指,同樣用返現價計,只要個市下行多322點就可以殺晒呢度啲牛證。但最吸睛嘅係29700至29799點,因為呢度有1538張期指,嘩!原來咁多人喺呢度博反彈架!不過要殺到落呢度就要恒指由現價跌522點先得。
係就係遠咗啲,但真係多貨喎;兼且6月係窮架嘛...不過我都係度度先!
作者阿珊,從事財經及投資版報道超過10年,由平面媒體走到網絡世界,《鐘擺戰策贏港股》作者。相信技術分析,由窩輪到牛熊證無一不炒,唔貪心,志在搵餐下午茶。
電郵:[email protected];微博#Gladyshan#