上周五美股先跌後回升,三大指數顯著上升超過1%,港股當晚夜期跟ADR均反彈,都預咗今日港股高開。不過港股乏力已成事實,早段恒指高開175點,最多曾升211點,見30138點半日高,其後掉頭倒跌134點,低見29791點,其後喺內地A股支撐下,作出V型反彈,拗腰倒升過百點。恒指中午報30077點,升151點;國企指數報12011點,升120點。
港股仍未走出上落市格局,不過喺中美貿易摩擦陰影下,港股將會繼續受相關消息左右,目前移動區間似乎有下移之嫌,上周移動區間為29800至30800點,上周恒指失守多條移動平均線後,移動區間或下移至29500至30500點。除非呢兩日恒指能收復10日線(30335點)及20日線(30432點)後,進一步重返50日線(30686點)及100日線(30708點)之上並企穩,否則移動區間向下,恒指先喺29000大關之前尋找支持機會甚大。
本來上星期大笨象(00005)一直跑贏其他三大重磅股,直至周五公布季度業績,季績公布未如理想,加上宣布回購計劃規模有限,亦係年內唯一一次僅得20億美元,股價應聲而下,股價更急跌逼近250日線。今日股價雖反彈0.6%,但力度略嫌不足,息差擴闊令大笨象受惠,但呢個理由都未能令資金留低,留意今次大笨象若再失250線(74元),恐怕未必好似上月初咁輕易能收復。
至於騰訊(00700)繼續做其軟腳蟹,股價仍然踩住地板行,短期唔似有運行。恒指服務公司上周五又作調動,騰訊喺恒指佔比又去到10%,跟大笨象平起平坐,恒指名符其實變做騰指,友邦(01299)保持第三位,佔比由8.78%略降至8.63%。今早友邦曾倒跌,大市亦被拖低。
至於石藥(01093)則成為藍籌新貴,股價今日反彈逾6%,中生製藥(01177)雖然未能染藍,但股價今早創新高,皆因公司準備二送一紅股,雖然下月初除淨,但股份二送一變相拆細,股份又惹炒風,加埋整個醫藥股板塊都見資金追捧,話咗呢個板塊逢回調吸納一定掂。
除咗醫藥股,阿Man亦一直睇好教育股,大部份教育股上周喺大市表現不濟之時,仍能夠企穩高位橫行,完成整固後,今早又有教育股破頂,包括阿Man推介嘅中教(00839)跟宇華教育(06169),雙雙創新高,其他教育股亦錄得不俗升幅。
新丁平安好醫生(01833)慘平稱作平安西醫,亦有缸邊友戲言此股為黃綠醫生,皆因股價表現實在太不濟,首日上市僅能險守招股價,今日更一度跌逾一成,低見48.9元,半日跌5.7%。平安好醫生表現唔多好,作為首次今年登場新經濟股表現如此不濟,跟住嚟香港上市嘅新經濟股,似乎未能寄予厚望。有人歸究於平安好醫生定價太高,其實新股如何定價都係一門藝術,要喺集資額跟上後仍有否上升空間上面取得平衡,往往考起大股東同埋整個上市團隊。首間申請以同股不同權方式上市嘅新經濟股小米,見平安好醫生上市後落得如此下場,唔知仲有冇本事嗌價過千億美元上市,阿Man睇就認為唔多樂觀。
麥狄文
(徐狄怡‧證監會持牌人)