熱門:

2018年4月23日 即巿股評 港股直擊

【輪證贏家】個圖畫到花晒!

上個星期五(4月20日)臨放假先嚟失手真激氣,朝早11點見恒指5分鐘圖SlowSTC(14,3)出現超賣,miss咗都唔緊要,因為仲有下半場1點20分同2點半恒指5分鐘圖SlowS TC(14,3)都出現超賣,不過呢三次超賣出現得太過迷離,個市嘅點數愈跌愈有,分鐘圖個超賣就超極都唔彈,最多喺下晝2點45分恒指5分鐘圖SlowSTC(14,3)嘅%K線同%D線由超賣上返去中軸水平,跟手%K線跌穿條%D,再次沉淪喺超賣嘅水平,恒指牛(59971)真係無晒辦法,見到個市咁霉但又有個短期「黃金交叉」喎,入咗嘅話擺明要捱價,既然係咁就更加唔搞隻(59971)住,搞咗都要拿拿聲走人;「咁隻騰訊(00700) 呢?」,照save入「我的股票」listing先囉,save 住唔會有事架,只係疑似「雙底」嘅物體就更係無咗啦,不過讀者Judy話我知佢好友羊羊揸住騰訊熊,驚咩呢?都講過我唔會100%準架嘛!我都會睇錯市同輸錢架嘛!今日咪全靠啲科技股拖低個市囉(唉~我戥我班developer 仔仔慘咋,四個有三個買咗騰訊,全數400蚊以上入市)。

依家10點21分,睇返恒指,暫時最低做過30187點,依家報30220點,跌198點,你都可以話個跌幅係收窄咗少少嘅;至於日線圖上嘅短期「黃金交叉」同「楔形」都係健在,而恒指現水平又處於「楔形」嘅中間;畫畫吓仲被我畫咗個「三角形」出嚟,而恒指依家現水平又剛好係呢個「三角形」嘅底,怪不得等咁耐恒指企喺呢個位唔上又唔落啦。

依家10點半,恒指點數做緊30195點,跌222點,將呢個數點放喺恒指牛熊證街貨圖上,其實都只係將30100至30199點裏面嘅少部分街貨食咗;就算用到暫時做嘅低位30187點去計,結果都係一樣。再向下數嘅話,落多100點其實係無乜睇頭,事關30000至30099點呢度得2張期指嘅街貨,唔知係咪唔記得咗呢;但再落多100點嘅話,即係29900至29999點,呢度就有成1047張期指,假設再向下行到29800嘅話,咁就連29800至29899點嗰795張期指都食埋,講緊只係料依家向下行多400零點就可以食到2061張張期指,望望月曆,今日4月23日,下個星期一(30日)就期結,得一個星期時間殺唔殺到400幾點?若然殺得到落去嘅話,唔通短期「黃金交叉」係一個假象?抑或個市殺到落去「楔形」底(約29766點), 短期「黃金交叉」先至發揮作用?如果係真嘅話,即係個市點都要穿 30000點啦?媽,我好亂呀,張紙被我畫到花晒,就嚟穿添呀! 「諗唔到咪行開吓囉,可能過一陣就會諗到呢!」 我老媽有時會咁同我講;如果呢個世界有「財經通勝」,可能今日係「宜觀察,忌落場」。

今日對我嚟講係一個比較特別嘅日子,就係我公公剛好走咗一年,多謝過去一年來大家都扶我走出呢個難關;今日亦都係我老爸榮休嘅大日子,成世人打份工一做就做咗30幾年,到依家55歲先嚟第一次派散水餅,老爸,你係得嘅!

作者阿珊,從事財經及投資版報道超過10年,由平面媒體走到網絡 世界,《鐘擺戰策贏港股》作者。相信技術分析, 由窩輪到牛熊證無一不炒,唔貪心,志在搵餐下午茶。

電郵:[email protected]

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads