阿Man都話侵侵嘅所謂貿易戰，只不過係談判籌碼，話口未完，隔晚已見佢同楓葉國跟墨西哥開出條件，只要肯簽新嘅北美自由貿易協定，就會取消對兩國實施關稅。說穿了，原來仲有數講，只要肯聽大哥話，肯讓步肯就範，一切仍然有商量。其實侵侵呢招重徵鋼鋁進口關稅，查實係聲東擊西，表面話要針對中國乜乜物物，真正要打擊嘅對象原來又係西方國家。
既然貿易戰搵水槍嚟打，又係口水戰居多，市場情緒有所紓緩，隔晚美股又嚟報復式反彈，三大指數回升超過1%，帶動港股連兩日挫逾千點後反彈，收復30000大關。恒指裂口高開近五百點，輕易收復100日失地，最高見30493點，其後升幅收窄，曾見半日低位30130點，中午報收30300點，升414點；國指則報12152點，升160點。
當噚日大市再失100日線(30014)之際，唔少缸邊友仲擔心緊，30000點再失，大市或要下試2月份低位，即重返29200點水平。不過阿Man又未太擔心，皆因29800點，剛好喺整個反彈浪計，黃金比回調0.736附近，去到呢啲位，就算之後要死落去試埋回調1，都有機會彈一彈，結果外圍反彈亦帶動港股由地獄折返人間。不過港股暫時難言脫險，始終仍受制多移動平均線，先要重上20日線(30700點)，再逐進向上挑戰10日線(30909點)及50日線(31142點)，港股方可脫離險境。長氣啲都講多句，一日唔重上31800點之上運行，港股呢個月都係有波幅，冇升幅。
重磅股方面，騰訊(00700)跌幾多，又彈番咁多，半日升2.8%，報收437元，要回復強勢，必要重上445元之上企穩，否則仍有下調風險。至於港交所(00388)則重上280元水平，半日升1.8%，報收282.4元，要回復升勢，先要收復290元失地。中資金融股呢幾日沽壓沉重，今日略為喘定，普遍回升1%以上，暫時低位徘徊未見睇頭，希望兩會之後去槓杆力度保持平穩，唔好太多遏止金融市場嘅措施出台，中資金融股方能逃出生天。其他重磅股普遍回升，當中又以三桶油表現較為突出，皆因油價創下近3星期最大升幅，除咗石油股，油服股跟燃氣股亦見回升。
話咗內房股係趁反彈減磅，而唔係去高追，呢個板塊阿Man唔係睇死佢哋冇運行，只係預期今年只會有波幅，難復去年勇，高沽低買冇問題，諗住長坐要諗諗。阿Man今年繼續睇好嘅板塊包括醫藥股、教育股跟濠賭股，每次回調都係撈貨好機會，今日金沙中國(01928)跟銀娛(00027)反彈超過2%，始於都係跑贏大市。
麥狄文
(徐狄怡‧證監會持牌人)
