噚日個市對淡友嚟講真係正到爆,原本朝早跌到落去11點半到就開始無事架啦,仲慢慢升返少少上去跟手橫行,誰不知淡友喺下晝3點對錶之後就一齊「衝呀!」「殺呀!」,質到個市跪低講對唔住咁滯,失守30000點都仲未夠,喺3點55分最低做咗29852點先至安落。若然見吼恒指5分鐘圖SlowSTC(14,3)出現超買時入隻恒指熊(57385)做day trade嘅話,收市前都已經可以食餬,按(57385)係約12點恒指5分鐘圖SlowSTC(14,3)出現超買作買入位,同埋下晝3點半打後恒指5分鐘圖SlowSTC(14,3)超買變超賣嚟計,食廿零三十格都真係唔成問題,以搵餐茶嘅幅度嚟計,過夜都慳返。
今朝起身睇電視報返噚晚美股表現,道指結束四連跌,換言之今日恒指理應跟外圍造好啦;結果今朝係地鐵度收到個push message「恒指高開494點,報30380點,重上100天線。」依家10點7分,開恒指5分鐘圖嚟睇,今日個高開概裂口真係清晰可見;不過咁大個裂口搶高晒啲技術指標,所以高開之後升幅出現收窄,但依家似乎收窄完,5分鐘圖見50分鐘線(5X10線,10點9分報30236點)成為咗短線支持。
轉返日線圖睇,恒指依家處於20天線(30700點)同100天線(30014點)中間,而20天線由2月頭開始到今都係下行中,再係咁落去唔排除20天線會穿100天線,形成中期「死亡交叉」。轉保歷加道通睇,自從上周三(2月28日)恒指穿咗條保歷加通道中軸(即係20天線)之後,至今一直keep住係條20天線底度下行;係呀,恒指無跌到落保歷加通道底部(29327點)附近先至作反彈,搞到個日線圖+保歷加通道中軸就好似山頂纜車咁,20天線就係嗰條纜,上個星期三至今日個五粒燭就好似五部纜車咁。
留意番,日線圖上14RSI只見43.19,SlowSTC(14,3)都係未見超賣,更正嘅係用恒指現價(10點20分mark到30254點)放落恒指牛熊證街貨圖做對比,由現價上行多746點先至踩到入熊證最貼價31000至31099點嘅門口,呢度有相當於400張期指;下行嘅話只要下行454點就到牛證最貼價29800至29899點,呢度就有相當於830張期指;若然下行多100點,即29700至29799點,仲有660張期指等住你添。恒指Put(19419),行使價29888點,槓桿約12倍屬偏高且引伸只約20%,街貨就多咗少少,Over20%,但都係一兩日貨仔,甚至day trade都未定,所以OK啦。
作者阿珊,從事財經及投資版報道超過10年,由平面媒體走到網絡世界,《鐘擺戰策贏港股》作者。相信技術分析,由窩輪到牛熊證無一不炒,唔貪心,志在搵餐下午茶。
電郵:[email protected]