隔晚美股表現反覆，早段鮑爺講話似乎減鷹加鴿，一度令美國10年期債息回落至2.82水平，帶動美股反彈逾百點。但美股尚未喘定，侵侵忽然宣布向進口鋼材及鋁材，分別徵收25%及10%關稅，市場憂慮爆發全球貿易戰，最終導致經濟放緩，美股終急挫收市，三大指數再跌逾1%。作為全球股市大佬，美股一死全球股市陪葬，亞太區股市全線下挫，港股當然未能獨善其身。
恒指低開433點之後，跌幅曾收窄至373點，見過半日高位30670點，但沽壓持續，盤中最多跌566點，低見30477點，幸未有再失噚日低位30453點。半場恒指報收30568點，跌476點；國指跌近2%，跌235點，報收12193點。侵侵針對嘅貿易對手係中國跟俄羅斯，以為內地股市閒閒地要跌1至2%，但上證指數僅跌0.3%，或跟兩會開幕在即，阿爺有心維穩有關。
至於港股重磅股，表現以中資金融股最為疲弱，一旦爆發貿易戰，反映經濟嘅中資金融股將首當其衝，沽壓自然亦較大。至於其他重磅股，暫時以大笨象表現最難睇，公布業績後即見光死，咁大枝陰燭插水，短線好難翻身，雖然利率趨升有利息差擴闊，但欠缺回購力量支持，一沉百踩。
騰訊(00700)昨日大幅反彈後，今日未見抹去全部反彈升幅，而半場最低見436.2元，亦跟噚日低位有段距離，始終集團喺今個月派成績表，而業績一向有保證嘅騰訊，仍有一定捧場客趁低吸納。至於港交所(00388)跌勢亦尚算溫和，上市制度改革，定必吸引更多公司上市，即使近日成交縮咗水，但睇在龐大嘅IPO資金將流入，同樣有投資者願意逢回吐買入，限制其跌勢。
阿Man較為奇怪係，中正貿易戰第一槍嘅鋼材股同鋁材股，跌幅唔算好嚴重，本以為最低消費係3%以上，但板塊內股份普遍跌2%左右，只有以俄羅斯作為基地嘅俄鋁(00486)跌逾3%。暫時貿易戰爆發與否仍屬未知數，但諗深一層，一旦貿易戰開波，美國將成眾矢之的，難怪白宮內對徵收重關稅反對聲音不少。其實侵侵作為一個商人，亦應明白呢個道理，估計今次徵收鋼材鋁材重稅，不過係擺擺姿態，最終目的係作為講數籌碼，希望從各國貿易夥伙上取得最大利益。
若果問阿Man後市點睇，目前都係反覆，目前水平剛好係早兩日反彈回吐黃金比0.5，守得住喺現水平，又未必係太差，稍後港股會否進一步下試30000點，要睇美股仲要唔要碌落山，暫時美股叫守住100日線，一旦美股失守，港股當然無運行。相反美股反彈，港股仍有條件再收復31000失地，不過31800點目前仍有段距離，未能突破呢個重大阻力，港股三月只會玩大型上落震落，再挑戰高位變得遙不可及。
麥狄文
(徐狄怡‧證監會持牌人)
