一早返到公司，凳都未坐暖就有個妹妹走嚟大笑「哇哈哈」，望望先知原來係噚日無返嘅同事Running，未過年之前佢指定咗要某間財經網站出嘅利是封(大學同學Milk寄比我嘅)，因為佢話嗰隻利是封好聞喎，well，我都係第一次被人要求要用指定嘅利是封入利是。
雖則新一年就新開始，不過噚日恒指CHOK到飛起，全日高低波幅都有成600點，最終收市始終見紅；低位30720點穿過條50天線，就算今日恒指做返好，但見10天線(30369點)同100天線(29753點)愈來愈近，都唔知會唔會整多個「死亡交叉」出嚟。
依家10點12分，恒指做緊31075點，升202點，開恒指牛熊證街貨圖，下方最貼價牛證30400至30499點同埋30300至30399點絕對係最吸睛，事關呢兩個範圍分別有792同883張期指，唔單只係牛證區最重街貨，仲係成個表之中最多貨嘅兩個地方，但同現價比較嘅話一睇都知爭得幾遠，由現價起步下行多675點先可以食到第一批重貨；若然落多100點嘅話咪就係第二批囉。
但如果個市上行又點呢？無嘢嘅，少啲肉食咁解啫，不過最近個位係31300至31399點，只要現價升多229點就可以食晒呢個範圍嘅貨，只係呢度得127期指，唔知夠邊個食啫；望望月曆，原來久休嘅A股明日開市。
係呀，你啱呀，正所謂：橋唔怕舊，最緊要受！(你夠年年買花比女朋友/太太做情人節禮物囉！好有新意咩？)上上大陸報價website，搵條上證綜指睇，上個星期三(2月14日)收報3199點，日線圖見上證最後粒燭爬返上條5日線(3186點)之上，同時由於前三四日粒燭係完完全全跌出咗保歷加通底部，依家終於都叫做回復正軌；重點係內地股市開市開紅盤嘅重要性，比港股開紅盤還要大嘛，A中Call(20735)，行使價16.38元，2%輕微價外，小注一試無妨呀！
作者阿珊，從事財經及投資版報道超過10年，由平面媒體走到網絡世界，《鐘擺戰策贏港股》作者。相信技術分析，由窩輪到牛熊證無一不炒，唔貪心，志在搵餐下午茶。
