所謂物極必反，美股上周五再度以千點波幅招呼缸邊友，道指早段曾再下挫低見23360點，其後反彈至最高24382點，最終報收24190點，又一次來回地獄又折返人間，而港股則喺夜期時段先見29000水平，再喺ADR及新加玻黑期指段死過翻生。
恒指早段高開205點，見過29713點後升幅收窄，最低見29517點，其後內地股市低位反彈，帶動港股100日線(29618點)失而復得，半日最高見29801點，中午報收29717點，升210點；國指則報12003點，升101點。不過期指仍低水過百點，反映好友反擊力度一般，可能係長假期在即，就算港股短線見底，喺外圍市況仍然未穩之下，缸邊友未敢太過進取。
重磅股普遍反彈，反彈力度以股王騰訊(00700)較佳，但半日彈2.5%唔算得係乜，中午報收417.6元，短線反彈阻力大概423元。至於港交所(00388)跟平保(02318)，分別反彈1.2%及1.4%，前者要守260元，後者則要力守80元。大笨象(00005)下周二派成績表前表現一般，反彈力度略嫌不足，缸邊友似乎想等埋業績再作定奪。
話咗油價再上空間有限，上周五油價急回%，拖累三桶油低開，不過跌幅尚算溫和，中石化(00386)更隨大市回升1%。油價價跌又益咗航空股，幾隻中資航空股齊齊勁彈，國航(00753)升7.2%，；南航(01055)升6.4%，；東航(00670)升4.3%。另外做油價期貨合約對油嘅國泰(00293)，明明油價回升先係利好，竟然都有3.3%反彈，真係吹佢唔漲。
至於阿Man今年仍大睇好嘅醫藥股，今日再度回勇，當然強勢股係跑贏大市，市跌時回得唔多，市場一回升即勁彈。除咗醫藥股，呢個情況亦出現喺濠賭股身上，加上春節假期預料今個月盤數都唔錯，長假期前例炒，只係撞正大跌幅，上星期先見腳軟，但相對其他重磅股跌幅，濠賭股沽壓唔算嚴重，反彈力度亦唔錯。
今日港股反彈略嫌未夠力，可能內地股亦未穩仍然阻頭阻勢，以高位累計跌幅逾4000點計算，反彈番1000點，重上30400補裂口亦唔過份。不過暫時啱啱先守番住條100日線，急跌後元氣大傷，或者要喺100日線企定多一兩日，反彈方能持續。究竟港股已成功尋底，或只係死貓彈，暫未能確定，至少要企住100線，兼且重上30200點之上，成功尋底方可確認。港股要確認見底回升，首要係收窄單日波幅，動輒過千點波幅一日，仲邊有缸邊友肯入場捱打，要大市見底，先決條件係要定落嚟。
麥狄文
(徐狄怡‧證監會持牌人)
