|
熱門:

2018年2月12日 即巿股評 港股直擊

【輪證贏家】恒指與100天線糾纏中

上個星期五(2月9日)恒指一個裂口低開跌穿30000點,拿拿聲揀定隻恒指Put(18305)出嚟諗住做day trade,結果等到朝早11點45分同埋下晝2點50分至3點半到,恒指5分鐘圖SlowSTC(14,3)出現超買,對於(18305)嚟講係落場位,如果係早場入市嘅話,咁係下晝1點40分至2點15分,見恒指5分鐘圖SlowSTC(14,3)由超買變超賣時,(18305)就應該功成身退;若然係下半場先嚟入市嘅話,咁(18305)就只能夠係尾市趁恒指5分鐘圖SlowSTC(14,3)出現第二次超賣時走人,否則就要過兩日夜啦。如果上述兩個出入位都成功嘅話,咁應該都有10格8格落袋嘅;但若然持貨到今日嘅,按今照恒指開市升206點,報29713點嚟計,可能真係會嚇一嚇;依家10點26分,恒指升幅有所收窄,升緊151點,報29658點,(18305)應該上返去接近買價嘅水平,但係如果有位嘅話都應該要走啦,事關恒指5分鐘圖上雖然依家恒指受制於500分鐘線(5 X 100線,10點29分報29654點),但由今朝到依家走勢上恒指砌緊個「三角形」出嚟,同時SlowSTC(14,3)落極都只係中軸水平。

轉返去睇日線圖,今朝開市後無耐做咗個高位出嚟,係升穿過100天線(29617點),咁當然啦,隨著恒指升幅收窄,100天線得而復失,但見14RSI跌到落31.76,SlowSTC(14,3)低位%K線(8.623)升穿%D線(5.513),估計短期內再跌嘅機會較低。

依家10點35分,恒指報29616點,用呢口價計落去恒指牛熊證街貨圖上,下方最貼牛證係29100至29199點,呢度有624張期指,同現價比差516點;至於上方嘅熊證最貼價就32600至32699點,呢度有相當於651張期指,不過呢個位置同現價就相差成3083點。

「現價同牛證咁近,咁咪即係會繼續下行囉?」雖然依家咁計落係就係下行着數,但可惜從技術指標嚟睇,就算下行都唔會行得好遠,更何況呢啲咁嘅環境同前幾個月一樣,無貼價證,呢啲情況你估發行商仲唔拿拿聲補咩;反正都臨近新年,估計呢排都係偏靜,就暫時由得個倉都係靜啦!

今日農曆十二月廿七日,小妹未咁快放年假,只係想同我公公講聲生日快樂!願你在另一個世界繼續快活過日!(老人家係計舊曆生日架啦!)

作者阿珊,從事財經及投資版報道超過10年,由平面媒體走到網絡世界,《鐘擺戰策贏港股》作者。相信技術分析,由窩輪到牛熊證無一不炒,唔貪心,志在搵餐下午茶。

電郵:[email protected]

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。