係，大家無估錯，我今朝的確又係被人嘈醒，不過係7點幾電話響至8點鐘我先識得醒，仲要係被台長個Whatsapp響醒(坦白講我連自己鬧鐘響都唔識醒)。起身睇番堆Message，美股跌1032點，因為美債息高…嗯嗯，如是者今日成個亞股都見紅。恒指今早開市無咗30000點，開報29679點；最低做過 29422點，穿咗條100天線(29602點)。依家10點正，恒指跌夠一千點有多，就算你依家先嚟瞓醒，噚日隻恒指Put(21206)都由噚日輕微價外變成依家極度價內，幾時收割都仲得。
後市會係點？大家一齊睇吓呢個圖，係我特登搵我哋公司位好可愛嘅designer Priscilla幫手畫嘅(我自己畫埋嘅話應該交唔切稿啦，呢位妹妹今年畫嘅利是封Design獲得一致好評添)，50天線(藍色；30607點)早己失守，之後大家都望住條100天線(綠色；29601點)，可惜今日裂口下挫時，順便挫埋呢條線之餘，就連由2016年2月12日低位18278點度至今年1月29日高位33484點，拉個黃金比率出嚟，其實係條100天線上少少位置就係0.236水平(29896點)，依家兩個位都穿晒，不過唔緊要，下方仲有條0.382(27676點)同埋250天線(橙色；27184點)。「會唔會跌到咁低呀？」當呢個世界講緊美股進入技術性調整範圍嚟講，港股插到邊都真係好難講，但可以肯定嘅係去到呢個位日線圖14RSI落到28，剛好踩入超賣範圍；SlowSTC(14,3)進入嚴重超賣就梗架啦；講咗幾日嘅MACD仲爭條EMA(9)跌落負數區就正式發出「雙熊」訊號；比較有「啟發性」嘅就係條DMI，啟發到我即刻跑去Priscilla度叫佢幫我係個圖度加返上去。
大家都知道DMI嘅ADX係做咩架啦，唔知唔緊要，我唔會叫你上網Search咁賤嘅，ADX就係反映大市嘅力度，條線向上就代表個市力強，向下就代表力度弱，留意返呢度係唔涉及反映大市升定跌，只係力度啫。今日個圖因為畫兩年恒指日線圖，可能大家未必睇得咁清楚，如果你開日子短少少嘅日線圖睇，你就會見到條ADX雖然由1月29日高位緩緩向下，但依家走勢似乎有兜底向上嘅現象。假如，我只係話假如，港股要繼續跟外圍跌而ADX真係兜底向上嘅話，都唔排除往後啲大題會變成：下望250天線(又係傳說中嘅牛熊分界線)。
開恒指牛熊證街貨圖睇，將圖嘅指數區域由過往睇開嘅100改為200(如果用100嘅話，咁即係圖中顯示10個牛熊證區夾埋先得1000點，即係全數死晒無嘢睇架)，依家10點54分，隨住騰訊(00700)連400蚊都保唔住嘅情況之下，恒指報緊29151點，跌1300點，so far大市食咗4325張期指，呢個數量同一餐團年飯有得fight，如是者大市依家踩住係29100至29299點，呢度有相當於346張期指，但按暫時最低位29129嚟睇，呢346期指當中有絕大部分已經死亡，再數落去嘅都真係唔多貨係度；都係嘅，唔理買輪定買證，揀個位都好少一揀就揀到過千點咁誇張嘅。恒指Put(18305)，行使價28600點，槓桿同引伸都只可以話適中，因為靚輪嘅街貨都已經over 50%，估唔到上個星期同人搶完暖風機之後，今日就要同人搶Put輪添；小注day Trade，因為今日係星期五。
今日特別鳴謝公司的designer Priscilla，啱啱放完假係上海返嚟就被我點佢去畫圖啦。
作者阿珊，從事財經及投資版報道超過10年，由平面媒體走到網絡世界，《鐘擺戰策贏港股》作者。相信技術分析，由窩輪到牛熊證無一不炒，唔貪心，志在搵餐下午茶。
電郵：[email protected]
