認真，呢一兩日都收到唔少讀者來email問「個市到底未架？」、「係咪應該撈吓貨呢？」其實10個email send嚟，10個我都係咁答：「睇定啲先啦！」噚日朝早恒指升近900點時，相信好多人都好後悔點解噚日唔低撈；不過呢個世界就真係有早知，無乞衣嘅，正如我老媽噚日食Lunch時Whatsapp同我講：「坐我隔離個男人話佢噚日(前日)入咗貨，佢依家係度發緊脾四。」算啦，咁都要視乎個男人買咗啲乜嘅；其實老媽你都有入貨呀，係咪。
今日見到恒指有返啲起色，但日線圖見到今日粒燭就喺條50天線(30616點)浮浮沉沉，依家10點47分，恒指目前呈「十字星」吊住咗喺條50天線附近，同我哋個data provider兼老友Zoe講緊個電話時見到原來日線圖上出現咗個短期「死亡交叉」10天線(32057點)失守20天線(23126點)；轉條保歷加道通睇，當然呢三日都係失守保歷加通道底嘅，但重點係今日見到保歷加通道口明顯拓寬，咁即係話個市如果要繼續下行嘅話，保歷加通道係會比位佢跌嘅。
再開埋牛熊證街貨圖睇，依家10點54分，恒指做緊30572點，最低見過30345點，呢個點數度上去嘅話，好明顯現價同牛證街貨近好多，依家牛證街貨最貼價嘅係30200至30299點，呢度有相當於869張期指，同現價比嘅話，只要現價再向下行多372點，就可以食得到呢869張期指，重點係雖然呢度無過千張期指，不過869張嚟講已經係牛證重貨區啦；對比上方熊證最貼價嘅32600至32699點，呢度有相當於678張期指都係重貨，不過同現價爭成2127點先可以食得到呢！
又咁講，再Put落去其實獲利程度肯定無早兩日咁誇張，你見恒指日線圖上SlowSTC(14,3)嘅%K線同%D線分別報2.47同14.68都知道再插嘅位係有限，當然你可以話14RSI依家先報37.37，有排先到超賣(更甚是嚴重超賣啦)，SlowSTC(14,3)絕對可以係低位以一條蛇嘅方式爬行，但少咗一隻技術指標下行嘅話，始終都係爭少少，就當比個面今日嘅「死亡交叉」，恒指Put(21206)，收回價30200點，屬輕微價外輪，雖然成交係唔特別多，不過高槓桿、低引伸咁就夠啦！
作者阿珊，從事財經及投資版報道超過10年，由平面媒體走到網絡世界。相信技術分析，由窩輪到牛熊證無一不炒，唔貪心，志在搵餐下午茶。
