噚晚美股玩過山車，道指先低後高，早段曾跌超過500點，收市倒升576點，帶動港股反彈。港股裂口高開782點，開市升幅曾擴大至877點，見過半日高位31472點，其後A股急轉直下，拖累恒指升幅收窄至只有280點，見半日低位30876點。恒指中午報收30981點，升386點；國指則報收12801點，升114點。
重磅股全面反彈，騰訊(00700)早段曾升逾5%，高見432.8元，半日報收424元，險守50日線。港交所(00388)升2.8%；平保(02318)彈1.77%建行(00939)半日僅升1.3%；工行(01398)升1.7%；友邦(01299)升1.4%，普遍重磅股都錄得1%以上升幅。美中不足係大部份大價股都係高開低走，雖然半日仍保持上升，但反彈升幅大大縮水。
噚日阿Man叫大家要喺50日線附近開始收集，尾市大部份重磅股力壓，仲要有咁低質咁低，原因好簡單，一為神功，二為弟子，除咗要殺30600點之上嘅所有恒指牛證之外，就係要盡隻幾隻重磅股嘅牛證街貨，唔單止要鋸和牛扒，收市前連牛柳絲都唔放過。先睇騰訊嘅首個牛證重貨區410元至432元嘅所有牛證，經已全數陣亡。暫時下一個重貨區喺400元至407元，相對大約係360萬股街貨。而港交所喺266元樓上嘅牛仔亦全部入土為安，下一個重貨區喺250元至255元，嗰一區嘅對沖股數為114萬股，而255元至266元，夾埋對沖股數唔夠150萬股。以呢隻重磅股噚日競價時段刻低U低，擺明係為咗殺牛。
不過大市噚日遺下嘅巨型下跌裂口31700點絕對唔易補，加上北水只餘下兩個交易日可以入場，之後五個交易日暫停，而外圍股市亦未算完全回穩，估計港股喺農曆新年前後將較為反覆。預期大市會喺30600點至31600點之間上落，不過現貨再出現噚日嘅大減價機會唔大，噚日午後有出手撈平貨，建議綁好安全帶坐穩，只要美股唔再出現大崩盤，港股經過一輪整固，下個月迎來業績期，仍有機會重展升勢。
麥狄文
(徐狄怡‧證監會持牌人)
