熱門:

2018年2月7日 港股直擊 即巿股評

【輪證贏家】跌完啦?

噚日做到水都斟唔到、連廁所都唔得閒去,成日就坐咗喺張凳度對住個電腦、恒指圖、電視同個打稿CMS,一到4點10分成個人散晒咁滯,恒指Put(21530)就當然有留意到啦,不過都要等到下半場1點45分至2點10分呢段期間,恒指5分鐘圖SlowSTC(14,3)出現超買,(21530)先有位落場,今次揸到下晝3點,見恒指5分鐘圖SlowSTC(14,3)由超買變超賣,(21530)可以收隊;若然miss咗嘅話,唔使驚,臨收市前10分鐘恒指5分鐘圖SlowSTC(14,3)再次跌到落嚴重超賣嘅水平,講緊個市都跌1500點樓上,全日最多都係見過跌1600點附近,(21530)仲唔走,等咩呢?

今朝起身開facebook,除咗見到各大傳媒報緊台灣歡花蓮地震單嘢之外,就係講緊噚晚美股來回地獄又折返人間十幾次,裂口低開逾500點之後來來回回幾轉,到最後倒升500幾點;然後今日日經、恒指、上證…全部跟升,合理呀,大家會認為咁深度嘅調整一次就好啦,然後今日恒指彈700幾、800幾點,對於噚日尾市執Call/牛證嘅朋友(嘩!咁真係好大膽呀!)又賺多餐下午茶。

依家10點半,收到消息話「因應流感爆發,當局將宣布小學及幼稚園明天起停課」,唔知我老細幾時會宣布「因應流感爆發,大家今天起停工」呢?老細,我等你宣布呀!期間我繼續睇住個市呀!恒指依家做緊31290點,升695點,擺明比今早升幅有所收窄;但呢口價放落恒指牛熊證街貨圖嚟講就處於中間位,兩頭唔到岸係最麻煩架!唯有轉睇技術走勢啦!

日線圖上見噚日恒指粒燭係明顯跌穿保歷加通道底部同條50天線,今日一彈兩線都失而復得,不過見下方技術指標似乎叫大家繼續小心行事,SlowSTC(14,3)%K線同%D線分別報18.70同33.18,係落咗去超賣區,但SlowSTC(14,3)咁鬼敏感,%K線同%D線係絕對有機會見到個位數字;MACD嘅「熊差距」同DIV處於負數區好耐,同時開始有出現「雙熊」嘅跡象;DMI方面,+DI仍然低走於-DI,至於14RSI就處於44.8,真心呢條線係未見超賣嘅,似乎今日又可以疊埋心水做嘢(坦白講呢兩日打稿都真係打到手指痛)。

上年市旺,特別係近呢一兩個月,多人睇市就自然多人check股價/用報價app,係就係生意好咗,之但係同時間都做死人呢!所以呢期回覆讀者嘅email可能會比之前慢啲,Sorry囉,將就吓啦,我都係打工仔嚟架咋!我都要交數比我老細架嘛!(同埋手指真係痛,打得慢咗好多…)

作者阿珊,從事財經及投資版報道超過10年,由平面媒體走到網絡世界。相信技術分析,由窩輪到牛熊證無一不炒,唔貪心,志在搵餐下午茶。

電郵:[email protected]

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads