呢兩日真係凍到無朋友，係咀唇變紫、腳趾長期無血到嘅情況之下同老爺去電器舖買暖爐；Well，正確嚟講唔係買，係搶，事關我落到去嘅時候，個哥哥仔已經同我講所有暖風機/暖爐賣到最後一部display，翻貨講緊係農曆新年後嘅事，正當我睇緊買邊部display時，有個後生仔係我後面，指住我睇緊個部，然後同個sales哥哥講：「我要呢部」，個sales哥哥都只能對住我苦笑。
另一個sales哥哥走嚟同我講：「如果你覺得呢部啱嘅話，個倉仲有兩部新，但得返番一隻顏色」，本小姐已涷到七彩咁滯，我理得佢咩色呀，走埋去先知道呢位sales哥哥介紹緊嘅就係傳說中又係暖風、又係風扇，仲有埋空氣清新function嗰部機，盛惠五千二，正當我諗緊嘅時候，左邊一家三口嘅伯伯話：「好啦，買啦」，計計數，吓？個倉入面咪得番一部？右邊又有一個啱啱行過嚟睇機嘅大叔，唉，老爸金句：「錢解決得到嘅問題就唔係問題」有時都真係幾啱，「我要一部」呢四個字每隻字都過千銀，企我左邊睇緊個大叔唯有「哈哈」兩聲；就算用埋老爺係上年公司聖誕party抽中咗千五蚊現金禮券，都仲要比三千幾，就算除返開佢三個function，每個都要千幾蚊…坦白講，真係好肉赤，肉赤到我同戰友Jack係whatsapp告解(留意返，我都只係一個打工仔嚟架咋)。
咁死貴買部機返屋企，今朝睇電視見到天文台發出「霜凍警告」，個心都開始無咁赤，同時諗住之後勤力啲、努力啲啦，誰不知今朝完咗個U盤之後戰友Jack whatsapp嚟同我講話個市跌886點，我仲以為一係佢打錯，一係我睇錯，戰友又點會呃我呀，今朝真係跌886點架，害到我企係條行冒死拎對手出嚟，send咗三個notification push之後先繼續行返公司；依家10點8分，恒指跌幅明顯有所收窄，講緊跌626點，報31975點，20天線(32199點)穿埋，上個星期三(1月31日)時本欄條題大大隻字寫住「目標：20天線？」嗰隻恒指熊若然唔係被之後個兩日市chok到嘔白泡嘅話，我就唔使肉赤緊部機啦！(我知，說話嘅嘢又無得早講嘅)
依家10點13分，恒指現報31947點，最低暫時做過31712點，開埋恒指牛熊證街貨圖睇，由32300至32399點開始到31800至31899點呢一大截嘅牛仔全數死亡，夾埋有4554張期指，肥美程度同A5和牛都無咩分別，變相依家最貼價嘅係31700至31799點，呢度有177張期指。由於恒指牛熊證街貨圖其實係隔日數字，所以依家暫時見到嘅期指張數一啲都唔多，暫見31500至31599點呢度301張期指叫做重貨，好明顯今朝殺完之輪之後，大市應該會係度紮營抖抖。
上方熊證最重街貨講緊係33500至33599點，有1392張期指，呢班熊證估計今朝向下殺落去嗰下都已經收割，再買跌嘅都會將熊證收回價向前移幾級，貼價啲槓桿又高啲呢。
走勢上，20天線無埋同時暗示現價已進入保歷加下降通道，保歷加底等於30835點，50天線就再落啲，係30566點；拆開5分鐘圖見到恒指雖然低開後有回升，可惜力度唔夠，觀乎今日恒指跌800幾點可能夠皮(唔知下半場會唔會失心瘋走嚟跌過千)，但都有跡象顯示大市往後下行機會較高，恒指Put(21216)，行使價31388點，屬輕微價外輪，換股比率10000適中啦，見恒指5分鐘圖超買先好落場。
作者阿珊，從事財經及投資版報道超過10年，由平面媒體走到網絡世界。相信技術分析，由窩輪到牛熊證無一不炒，唔貪心，志在搵餐下午茶。
