呢期恒指chok到頭都暈，牛熊證分分鐘被個市chok斷頸都未知咩事，明明晨早粒燭仲係條10天線樓上，收市時升轉跌，揀定出嚟嘅恒指Call(21423)從恒指5分鐘圖上見係朝早11點同臨完上半場前都出現超賣，Call輪落場本來就唔怕會被打靶嘅，但同樣都係怕市況唔就都係死路一條。以頭先嗰兩個靚位入市時間計，(21423)輪價約0.245至0.25元，收市報0.241元，賬面暫輸1.6%至3.6%。
今日其實10點未到就返到公司開晒所有機，不過就係部私伙mac機死都要我update，搞咗大半個鐘都仲update緊，「咁點解唔用公司部電腦頂住先呀！」哼，有邊個會諗到做online嘅地方部電腦係唔support streaming，我都唔想！開得返部機講緊都10點29分，恒指今朝個裂口都補完，(21423)最高只係做過0.242，咪玩啦，咁樣得一口價我都好難做架，好在小注唔重貨，Call輪嚟講都仲有啲本事去揸多陣嘅(重點係噚晚我老媽嘅生日飯係我家老爺好豪氣地碌卡，請晒成枱人食飯，包括我，嘻嘻)。
幫隔離sport同事搵完啲財產界人事幫手寫世盃稿之後，都已10點50分，開恒指牛熊證街貨圖睇，mark底依家恒指報32642點，日線圖上處於10天線(32785點)以下水平，暫時最低做過32321點，即係話牛證區嚟講，大市今朝下挫將牛證殺到落到32300至32399點，呢個範圍內相當於558張期指，本來屬第四貼價區，咁依家就好明顯升咗做最貼價牛證區啦，此前個三個100範圍嘅牛證total就有287張期指，對於大戶嚟講的確只係一個早餐。
重新望多次牛證區，承上所指恒指最低做過32321點，換言之32300至32399點呢度其實都只係得21點去頂住，而裏面嗰558張期指都預咗絕大部分已經死亡；第二貼價範圍變成32200至32299點，呢度有相當於1092張期指，再落多100點，即32100至32199點都有成717張期指架。
至於上方熊證，最貼價嘅係33000至33099點，呢度有相當於150張期指，但現價要由開始上行358點先可以踩入呢個範圍。依家10點59分，恒指又倒升返58點，做緊day high，呢358點會唔會今日突然爬到上到真係無人知，只知道嘅係一個咁chok嘅市，策略上買輪同以day trade為主就最穩陣，我都係搵個位掉走隻(21423)先。
作者阿珊，從事財經及投資版報道超過10年，由平面媒體走到網絡世界。相信技術分析，由窩輪到牛熊證無一不炒，唔貪心，志在搵餐下午茶。
