噚日恒指開市頭五分鐘之內已經再創新高，最高見過33484點，一下子搶到咁高擺到明啲技術指標同樣見超買，去到朝早11點15分，朝早個大裂口已經補咗，以為咁就跌完啦，誰不知朝早上演一幕「高處不勝寒」之後，緊接嘅係「低處未算低」，喺11點40分做咗個上晝低位32945點，而係呢段時間(補完裂口嘅11點15分至做出上晝低位嘅11點40分)，恒指5分鐘圖SlowSTC(14,3)出現嚴重超賣，抱着恒指會再升嘅心態下，恒指牛(60723)亦順利出現；上半場完結時，恒指上返去33300點，如是者就攬住隻(60723)等下晝反彈。
下半場一開波恒指就似乎無力再上，來來去去都係上到331xx點呢啲水平，即係同個朝早裂口底部差唔多嘅位置就原地踏步，好衰唔好係1點35分左右就見到恒指5分鐘圖SlowSTC(14,3)出現由此前嘅超賣變超買，形態上恒指生咗個「圓頂」出嚟咁滯，咁多signal話你知你係時候要走隻(60723)，計埋條數又剛好打個和，食白果都好過輸呀；但如果你咁都唔走，係下半場3點25分時，恒指5分鐘圖SlowSTC(14,3)再次見到超買，呢個時候(60723)可能開始輸入肉，之不過個市都第二次發出warning而都仲係唔走嘅話，今朝個下跌裂口真係嚇到心臟病發。
依家10點12分，mark底恒指現價32896點先，再開恒指牛熊證街貨圖睇，恒指雖然噚日同今日都下行，但觀乎呢期計親現價同牛證嘅距離都山長水遠，唔緊要，恒指下行少少嘅同時，其實都有貼價牛證同步上市嘅，依家先牛證最貼價嘅係32300至32399點，一計之下，兩者竟然差距由過往嘅逾千點縮窄到依家嘅596點，呢度有成1124張期指架；再落多100點嘅話，即係32200至32299點，呢度都有1082張期指，夾埋成2000幾張期指，話就話今日係期結啫，此前升咁多咩數都夠有凸啦；若然今日吽一日，到咗聽日就係新一輪期貨開始，呢2000張證都恐怕過唔到年。
上方熊證又如何？最貼價嘅就係33400至33499點，呢度得225張期指，同現價比就相差603點；單計呢口價都同下行殺兩層牛證街貨差無幾，但街貨量就差好遠啦。再加上今朝早戰友Jack溫馨提示我港交所(00388)同中國平安(02318)都穿咗條10天線兼無埋條「上升通道」，禾雀又未見，得返隻企鵝騰訊(00700)力守中，一於撓埋雙手、剝定花生等睇戲。
作者阿珊，從事財經及投資版報道超過10年，由平面媒體走到網絡世界。相信技術分析，由窩輪到牛熊證無一不炒，唔貪心，志在搵餐下午茶。
