噚日恒指繼續創新高,無他嘅,目的都只係令「創新高」呢個字感到麻木;而前日推介嘅吉利(00175)正股噚日因技術反彈而跑出,前日推嘅吉利Call(29277)最多升近八成,勢估唔到公司developer同事Cyrus都睇中咗隻吉利,可惜嘅就當然係無落場啦,唯有同佢鄰居同事Wilson分享,仲要被我企係佢哋後面發現佢哋睇緊我噚日條文,Well,我都唔想架。
由於前日推嘅(29722)已經由價外變價內,所以噚日再整多隻輕微價外嘅吉利Call(19922),諗住粗粗地博上10天線就算,誰不知隻吉利唔單止穿咗條10天線,就連20天線都穿埋,最高見過26.95元,由於噚日先推隻(19922),就當用開市價同最高價計,即(19922)最高升過47%,就算無呢個水位,半日升三成都叫做有交代啦。
同場加映咗隻昆侖能源(00135),係輪場嚟講昆侖的確係二三線冷門嘢,但對比起恒指超買再超買到唔知幾時咁,小注一博無頻撲,見噚日昆侖5分鐘圖係上半場11點55分至下半場開市至1點25分呢段期間,SlowSTC(14,3)出現超賣,有心做「美女」博昆侖Call(11453)呢隻「野獸」變「王子」嘅話,理應就係呢個時間試水溫;至噚日下半場2點50分至3點10分,昆侖5分鐘圖SlowSTC(14,3)%K線同%D線雙雙頂到盡見100,呢個絕對係將隻(11453)收網嘅時候,但可惜如果按入(11453)嘅時間,隻Call最低位嘅平均價係0.24元,對比SlowSTC(14,3)頂point時見到嘅0.239元,都仲係爭一格先為本(未計手續費呀),都唔知放好唔放好。若然呢個位放棄咗嘅話就當輸少當贏;如果揸過夜嘅話,哼,今朝仲有一個機會,就係9點40分。昆侖5分鐘圖SlowSTC(14,3)再見超買,此時(11453)見0.255元;如果miss咗嘅話,依家10點12分,見(11453)都仲做緊0.24元,勉強仲可以守得住,但恒指今日出現調整,雖則下個星期期結或者會再刺激市場氣氛,但我哋揸住嘅係輪嚟架,所以唔好用揸正股嘅諗法想去守呀。
望返個市,今朝早開市先衝上32981點再創新高,但拆恒指5分鐘圖就見到一條「下降通道」生咗出嚟,依家10點15分,恒指5分鐘圖SlowSTC(14,3)見超賣,或者暫時可以叫做跌定唞一唞,再加上見恒指牛熊證街貨圖上,按今日暫時做過嘅高位32981點計,即32900至32999點嗰439張期指已經被食得八八九九,變相可以視33000至33099點為最貼價嘅熊證區,呢度有相當於626張期指,亦係重貨區,既然下個星期期結,前夕時或會刺激激恒指上多一轉嘅話,何不唔視今日作為「大漲小回」嘅「小回」呢?恒指牛(69126),收回價31983點,同現價有逾800點距離,見到恒指又「創新高」嘅話就好收手啦,乜你唔覺呢期恒指「創新高」完就好興回落啦咩?
作者阿珊,從事財經及投資版報道超過10年,由平面媒體走到網絡世界。相信技術分析,由窩輪到牛熊證無一不炒,唔貪心,志在搵餐下午茶。