歷史性嘅一刻終於都出現啦,就係恒指升穿咗2007年10月時創下嘅高位31958點,噚日恒指以高位31983點收市;咁都仲未夠,今朝恒指再彈多165點開市,開報32148點;依家9點56分,恒指最高見過32233點,11隻藍籌創52周新高,唔好話恒指牛(64153),求其入隻牛證/Call輪你都豐收。
呢啲時間最例牌就係做「頭仔」(街訪)訪問,問吓老散點睇後市,總會有人繼續睇好或者覺得大市升夠,有貨嘅就揸住唔想放,怕放咗就買唔番;無貨嘅見到個個都好似賺到盤滿缽滿咁,唔入番少少又好似好蝕,但依家先嚟入貨個心又15/16,怕自己接火棒;再羅羅攣多一陣又怕個市又彈咗上去,唉,真矛盾。
唔好理人哋住,望返個市先,創完歷史新高之後,恒指牛熊證街貨圖的確好唔同,今日見恒指牛熊證1000點差距期指張數比例係51:49,即係開始進入牛熊角力嘅時候;再睇埋上方嘅熊證,依家10點5分,用恒指最高做過嘅點數32233點計,換言之依家大市踩入咗32200至32299點,呢度全區有相當於393張期指,亦即係話今朝個裂口上升就殺咗由31900至31999點,至32100至32199點呢三個100點範圍嘅熊證,呢度夾埋有相當於755張期指,對於呢期火紅火綠嘅大市嚟講,根本等同一個十零蚊嘅燒賣早餐。
開得個街貨圖就不如睇埋下方嘅牛證啦,最貼價嘅係31200至31299點,呢度有相當於1023張期指,以依家10點13分恒指報32106點計,即使講係最貼價,但同現價都有906點差距。大市開始面對一個兩難問題:上行路近但貨少;下行路遠但貨多。
今朝同老爺坐地鐵,我同佢講:「穿32000點啦!」然後佢玩住candy crash同我講:「呢啲時候小心啲呀!」依家10點47分,睇咗個市都成粒鐘有多都仲未睇到個方向,轉恒指波幅指數睇反而見到「倒T星」出現,唔通今次嘅大波幅就咁就完?反正恒指剛剛創歷史新高,生完仔都要比個大肚婆回吓氣架,呢個情況都係做觀眾好啲。
作者阿珊,從事財經及投資版報道超過10年,由平面媒體走到網絡世界。相信技術分析,由窩輪到牛熊證無一不炒,唔貪心,志在搵餐下午茶。