熱門:

2018年1月16日 即巿股評 港股直擊

【盤房來料】破頂在即 向三萬二出發

噚日以為港股可以十五連升,結果午後玩急轉灣,不過噚日阿 Man講過大市或者喺31700點稍作整固,誰知唔玩整固玩震倉,高位急急回吐400點,落到31300點水平,騰訊(00700)跟港交所(00388)更倒跌散場。不過瞓醒一覺港股又回復強勢,雖然隔晚美股休市,但道指期貨持續向上,逼近 26000 點關,帶動夜期回升。今早港股高開84 點,已經係半日低位,其後節節向上,至半日收市前最高見31766點,報收31751點,升412點;國指更厲害升 226點,報收12697點。

港股噚日同今日嘅走勢,似足上星期大市升至31300水平後,一度急回至30900點,以為連升多日要回調,誰知補一補開市裂口又升過。所以阿Man一再強調,見港股已升逾二千點,畏高唔敢入場一件事,切忌懶醒估頂做淡,咪以為有空軍伴你同行,見沽空金額持續上升,就跟空軍做淡友。根據過往經驗,沽空愈大,挾倉向上動力更大,往往要挾爆空軍,待空軍投降先有得回頭。話咗狂生特色就係快,調整快,升得更快,昨日騰訊創新高後回落,高位跌咗十幾蚊落去433.2元收市,今日輕易收復失地,半日回升10.4元或2.4%,報收443.6元,幾乎完全收復噚日失地。港交所(00388)表現更強勁,不僅完全收復昨日失地,更創285元逾兩年半新高,又向阿Man首個目標300元向前一步。大笨象(00005)半日升0.5%,表現平平,相對其餘三大重磅股王,確係慢半拍,但波幅相對低,走勢較穩定,適合心向較少,而又傾向收息為主要投資目的嘅投資者。

阿Man 踏入今個首個交易日,已大聲疾呼今年要買重港交所以餘,中資金融股亦不能缺,當中重中之重當然係平保(02318),新高停不了,今日再創90.95元歷史新高,半日升2.8%,報收90.7元。其他內險股亦錄得逾2%升幅,呢個板塊走勢大勇。除咗內險股,內銀股亦係月初阿 Man 叫必買板塊,而升勢的而且確擴展到次一線嘅內銀股,今日建行(00939)升 7.98 元創逾兩年半新高,其他內銀股升幅由 1.1%至 2.4%不等。

內需股亦係今年行程極佳板塊,今日食品股表現份外亮麗,蒙牛(02318)勁升 7%,係最大升幅藍籌,股價亦升至兩年半新高,其餘阿 Man 點過名嘅華潤啤酒(00291)、達利食品(03799)、康師傳(00322)等等,亦升 2.5%至 4.7%不等。

話過濠賭股逢回吐吸納,除咗睇好賭收持續回升,今年股價另一催化劑,當然係港珠澳大橋通車,銀娛(00027)又創超過三年新高。唔少粉絲見濠賭股升至現水平,都問好唔好食糊沽貨,阿Man都係嗰句,一日唔扭轉升勢,持貨要夠定力,有乜好過回一回又升穿前高位,一浪高於一浪,總之港珠澳大橋未正式通車前,濠賭股繼續上升,好似銀娛要重返歷史高位亦唔出奇。

一向對新股都係抱見好即收態度,噚日希瑪眼科(03309)未能收最高位,食糊走人無可厚非,不過林醫生一句同騰訊合作唔係冇可能,股價又升近兩成。不過咁多重磅股爆升都應接不暇,仲邊有多餘子彈去坐新股,新股都係短炒算數。

麥狄文
(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads