熱門:

2018年1月11日 即巿股評 港股直擊

【輪證贏家】恒指下行未?

今朝車都未落就收到個message話東鐵線全線暫停服務,我兩位親愛嘅designer齊齊困獸鬥,一個就落到車係咁拍片返嚟變身做記者咁款,同步地WhatsApp返嚟話無車出九龍(差啲想覆佢:其實如果有車出港島就得架啦,我哋返灣仔架!哈哈!);另一個就仲係架車裏面未出到嚟,事關佢坐個架車未埋站就已經被暫停服務,陰功,焗死我哋個designer妹妹啦!

趁電視台未開始做live之前,望吓個報價機,見到恒指見紅,而成版被我book mark咗嘅股份都係紅色,除咗隻滙控(00005)、平保(02318)、中移(00941)同埋香港電訊(06823),當中最標青嘅就梗係隻大象啦,依家10點19分,暫升2.1%;但再望望恒指個走勢,今朝先開報31066點,微跌7點,到正式開市之後恒指就繼續下行,拆開5分鐘圖睇,喺9點40分見到挫底至31005點就停,梗係啦,因為同步SlowSTC(14,3)都要見底回升嘛,其後回升至暫時高位31133點又開至軟皮蛇,若然噚日按策略係收市前入遠恒指牛證嘅話都唔駛灰心嘅,距離收市仲有幾個鐘嘅時間,不過就今日真係好搵個位走人。

點解咁講?首先要多謝戰友Jack,佢一句「開完會個市都係無郁既...」令我諗起一條好耐都無望過嘅指數VHSI(講真,成個恒指family咁多條指數,鬼得閒日日條條都望咩),呢條VHSI近日keep住係一個低水平範圍徘徊,呢個走勢同恒指近期嘅細波幅非常吻合;那邊廂,VHSI都係一條線嚟架啫,都係睇技術分析同走勢啫,由日線圖上嘅VHSI所見,SlowSTC(14,3)嘅%K線同%D線分別做11.28同10.27,雙雙處於超賣水平,暗示路隨時有反彈嘅可能;開埋條保歷加通道睇,其實由上年12月21日至今一直處於保歷加下降通道,至最近見保歷加通道口收窄,換言之再下跌嘅空間有限。將兩者加埋嘅話,即係話VHSI見底回升嘅可能性好高,即代表恒指或會即將出現一個波幅較嘅走勢。

波幅大對輪證有利嘅,尤其是輪,靠引伸波幅嘛,之但係呢個大波幅會向上定向下?其實講咗成個星期恒指日線圖多個技術指標都出現超買/嚴重超買就估到之後鐘擺擺向邊啦,問題在於超買嘅同時恒指牛熊證街貨圖上見到最貼價嘅熊證講緊相距100點都無,且係最重貨嘅一個範圍。但今日所見,熊證最重貨講緊係第三貼價嘅31400至31499點,呢度有1035張期指;而最貼價嘅31200至31299點,就只有179張期指,即係話依家啲街貨由初初嘅近熊轉成依家嘅遠熊,同時都反映到啲錢嘅心態係由初初嘅「升咁多仲唔跌?買貼啲槓桿高啲殺晒你班好友」到依家「大佬,連升12日啦,買你跌都買咗咁多人,退守咗咁多次,咪啦,一次過退後多幾步啦,麻煩!」

再望真啲,恒指日線圖上MACD,MACD(5,26)有向下跌穿EMA(9)之嫌,手執恒指牛摸着石頭過海嘅日子似乎要完結,恒指熊(67659),收回價31700點,同現價有逾600點差距但有約36倍槓桿,安全又夠爆炸力,小注試試水溫為上。

作者阿珊,從事財經及投資版報道超過10年,由平面媒體走到網絡世界。相信技術分析,由窩輪到牛熊證無一不炒,唔貪心,志在搵餐下午茶。

電郵:[email protected]

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads