美股隔晚繼續偏軟,聯儲局議息會議紀錄顯示,若非上月爆發俄烏戰事,大部份官員均同意加息半厘,而為咗抑壓通脹,其後每次加息半厘係適當行動,而每月縮表上限增至950億美元係恰當做法。其實加息、縮表、收水已經講咗一段時間,但呢兩日市場反應好似有啲過敏,留意標普條20天線喺4450附近,呢個位不容有失,否則美股再次轉弱。
港股呢邊噚日假後回吐超過400點,今早恒指低開170點後,一度倒升156點,見22236點半日高位,可惜內地股市跟外圍股市走弱,港股由升再轉跌,22000關再度失守,更跌穿10天線(21960),20天線(21363)不容有失,否則由上月中低位18200水平展開反彈呢一浪可能就此結束,港股要再向下尋找支持。暫時大市表現較為反覆,半日恒指收報21791,跌289點;國指收7497,跌111點;恒科指則跌97點,跌幅超過2%,報4490,又再跑輸大市。
藍籌股普遍向下,兩隻公用股中電(00002)跟電能實業(00006)逆市升,反映市場避險情緒正上升。美國10年期債息一度抽升至3年高位,對科技股的估值有一定影響,今日重磅科網股普遍受壓,ATMXJ之中,只有美團(03690)一枝獨秀,早段曾高見172.5元月內高位,可惜其他科網股受壓,美團半日升幅亦收窄至0.5%左右。
李寧(02331)半日彈1%,成為最大升幅藍籌股,可見藍籌股整體表現較為不濟。雖然息口趨升,但金融股今日未見受惠,半日大笨象(00005)跟友邦(01299)分別跌0.18%及0.8%,內險跟內銀股亦偏軟。不過內銀內險股走弱亦合情理,主要係內地為穩住經濟,唔排除月內減息降準。
生物科技股沽壓較大,龍頭藥明生物(02269)半日跌近6%,成為表現最差藍籌股,至於剛宣布新冠肺炎藥有重大突破嘅開拓藥業(09939),噚日爆升逾倍後,今日回吐,半日跌13.7%,呢啲消息股高追無謂,消息公布前無貨,最多都係食花生。其他生物科技股普遍跌半成或以上,呢個板塊暫時都係難搞,短線只宜觀察,眼看手勿動。
新浪報道指,原材料價格上漲超過一年,一位不願具名的某車企內部人士稱,有部份新能源車款成本和售價已經出現倒掛,基本上是賣一部蝕一部,汽車股今日受壓。加上隔晚中概股普遍下跌,蔚來(09866)挫4%、小鵬(09868)跌1.5%、理想(02015)挫2.3%,只在本港掛牌嘅比亞迪(01211)半日跌1.8%,汽車股中表現已算最硬淨,其他汽車股普遍跌2%以上。
京東系出現人事變動,京東集團(09618) 總裁徐雷將接替劉強東,擔任集團CEO,劉強東則繼續擔任董事會主席,致力於公司的長期戰略設計。有關人事變動整體對市場震撼性唔算太大,不過京東半日股價仍要跌3.5%。不過,京東已漸消化騰訊(00700)分派佢哋股份嘅沽壓,股價於220元有一定支持,而京東本身業績表現唔係差,呢啲位收集,博股價重上240至260元未嘗不可。
麥狄文
(徐狄怡‧證監會持牌人)