上個星期五(10月15日)喺【下半Part】揀咗隻恒指Call(24998)出嚟，以當日Patreon下半1點43分出文，再以出文後15分鐘入(24998)，當時(24998)高低位0.17元/0.168元計，平均買入價為0.169元。呢注一係玩得比較耐，因為如同上個星期喺【下半Part】所講「呢隻Call純以小時圖博指數可以再上25500點，即保歷加通道頂附近」，隨便幫幫喺之前見指數日線圖上破50天線失敗而出嘅淡倉。
恒指今朝完U之後開市報25425點，升94點，呢個點數計恒指已經踩返入熊證街貨第一層。反正未正式開市，見睇咗恒指牛熊證街貨最貼價層為25400至25499點，呢度有相當於422張期指；至於牛證最貼價層係新增街貨層，為24800至24899點，有相當於140張期指。以今朝開市開市價計，指數殺咗入熊證區，本以為指數會喺開市之後死跳多一下先至出高位回落，不過淡友實在太心急，開市後下也不會就向下插落，至依家9點45分，恒指倒逾130點，一度落返25140點附近位置，(24998)走都走唔切，唯有等指數跌定之後，睇睇會唔會有少少力撞返上五分鐘圖上嘅50分鐘線(五分鐘圖10線)或100分鐘線(五分鐘圖20線)時，搵到個靚位走人。
依家9點56分，終於見到恒指有跌定嘅情況，喺五分鐘圖上見指數於50分鐘線同100分鐘線之前，仲有一條250分鐘線(五分鐘圖50線)要突破，一旦破唔成功而50分鐘線同100分鐘線兩線繼下行，同250分鐘線相遇的話，三線匯聚隨時出現，到時隻(24998)點都要走。
唔駛幾耐，喺10點7分於五分鐘圖上已經見到三線匯聚嘅情況，Slow STC(14,3)兩線都作勢向下行，見到(24998)證價做緊0.161元，雖然換上小時圖見指數再次踩得返上保歷加通道中軸之上，但保歷加通道口愈來愈窄，而且Slow STC(14,3)%K線作勢下穿%D線，望望電話收到今日出中國經濟數據Push，似乎遜預期嘅比較大部份，見指數喺五分鐘圖上死都上破唔到條保歷加通道中軸，而保歷加通道底線又有拓闊嘅情況，(24998)都係要走人為上，還好仲有0.161元呢個位比位走，不過都係要輸4.7%。
至於聊天室戰友方面，晨早自行爬完熊再爬牛，依家見指數五分鐘圖咁嘅樣又準備再爬返熊，換返天線見50分鐘線似乎成為咗指數暫時阻力。恒指熊(55759)，收回價25687點，同現價有近400點差距，約40倍槓桿夠Day Trade用，進取嘅留意恒指五分鐘圖上50分鐘線，遇阻即出；安全嘅可以再等多次指數上唔上得返保歷加通道中軸先至再算。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
聊天室/Patreon：https://www.patreon.com/cbbcwar
Facebook：https://www.facebook.com/cbbcwar
