隔晚美股顯著下跌，港股噚日盤中一度跌逾千點後，今日仍未企穩，早段一度再跌逾300點，反彈乏力，目前險守24000大關。
恒指低開231點報23867，跌幅一度擴至327點，見23771點半日低位，再創自舊年10月5日以嚟新低，去到低位都有啲買盤吸納，大市止跌回升89點，見半日高位24188點，但假期前始終會有減倉套現活動，沽盤再現下，大市升勢不保，反彈乏力。恒指半日收報收24022，跌77點；國指半日報收8557，跌80點；恒科指跌94點，半日報收6176。
藍籌股反彈乏力，AMT繼續下跌，X則持平，阿里(09988)半日再跌2.4%，口痕友話阿里走勢相對穩定，係近年半穩定地下跌，低處未算低，跌極未見底。騰訊(00700)半日跌1.8%，美團(03690)半日則跌3.2%，半日只有小米力保不失，半日靠穩。
本地地產股上兩個交易日急跌後，今日止跌回穩，但彈力一般，雖然新地(00016)表示未有收到中央向香港地產商施壓消息，但市場始終有擔心，尤其見到內地企業被罰款或要佢出巨額貢獻，都咪話唔心驚。本地地產股彈得較多係信置(00083)，半日彈2%，其他四大地主佬，反彈唔夠2%，未有耐補得返呢兩日蒸發嗰條數。
內房股今日彈力好過本地地產股，一直三條紅線未達標係富力地產(02777)，主要股東以唔超過100億人仔，向碧桂園服務(06098)出售物管業務富良環球，主要股東再向富力地產注入80億元股東資金，開市曾升近一成，但高位即見有沽盤減持，半日升幅得返5.1%。其他內房股普遍反彈，相對近日累積跌幅，反彈幅度只係杯水車薪，喺恒大(03333)債務重組未有較明確方案下，內房股未宜沾手，反而噚日夠勇有博反彈，今日有食好食。
澳門上周入境旅客增加，濠賭股亦見反彈，跟內房股一樣，反彈力度麻麻，喺續牌仍未明朗化，及監管陰霾下，濠賭股嚟近都係有波幅，冇升幅。
港股弱勢持續，幾可肯定移動區間已下移一級，二萬四關若未能企穩，仍有可能進一步下試23000至23500尋找支持，而反彈預期20日線阻力較大，即係反彈大約去到25500左右，即未來移動區間將下移至23500至25500，呢段時間都係以守代攻，維持較高現金比例，待大市成功尋底再撈貨未遲。
麥狄文
(徐狄怡‧證監會持牌人)
