熱門:

2021年9月17日 港股直擊 即巿股評

【輪證贏家】恒指已到總站 多謝乘搭小熊快線

噚日揀咗隻恒指熊(56466)出嚟,仲喺噚日朝早10點35分至11點5分,見到指數上破100分鐘線失敗後再回返落去50分鐘線以下偷位出隻(56466),落咗場之後,指數已率先下日線圖上嘅保歷加通道中軸,所以再Set(56466)嘅總站喺24500點,結果,噚日恒指喺下晝做出全日低位24505點,喺一片「穿佢!穿佢!穿佢!」賭場般嘅呼歡聲之下,恒指喺最後一個鐘將跌幅收窄,對淡友嚟講,唔知恒指今日能否噓聲變出掌聲啦。

依家9點17分,恒指仲行緊U盤,趁呢段時間睇咗恒指牛熊證街貨圖先。如噚所講恒指熊證今日會有一層新街貨,最貼價層下移至25600至25699點,呢度有相當於366張期指,至於第二層25500至25599點巳經變成重貨區,亦都係噚日最多新增街貨嘅一層,有相當於865張期指街貨。

牛證方面,24500至24599點當然未死得啦,雖然走咗相當於590張期指街貨,但都仲有920張期指街貨喺度,似乎大家都捉住24500點「The 3rd Leg」呢個位嚟博指數會拗腰上返去,都係嘅,呢個位失都真係有啲麻煩,可能亦因為咁,牛證啲貨愈嚟愈重,喺24400至24499點都有逾800張期指街貨,落到24000至24099點,仍然過千張期指重貨區,期指張數除咗最貼價層之外,其餘所有層數都真係有多無少。

恒指行完U盤開市,報24589點,跌78點,開市之後恒指首五分鐘內已經跌穿24500點,喺五分鐘圖上見到指數喺第一支燭最低見24424點,總站已到,就當喺今朝開市首10分鐘計走隻(56466),以當時高低位0.141元/0.123元,平均落車價為0.132元,過夜平均即袋22.2%。

走咗隻(56466)之後,恒指即刻一個屈尾十向上炒返上去,跌幅收窄不得止,仲出現倒升嘅情況,最高仲見指數上返去24700點以上水平,合理嘅,反正都企喺24500至24599點牛證街貨裡面,切咗塊扒又無理由咁浪費唔食埋啫,「The 3rd Leg」又出埋,比啲位好友威吓都要嘅,喺小時圖仲見到Slow STC(14,3)兩線於嚴重超賣水平似行完超賣再超賣咁抬起頭來,不過都要問過10小時線(小時圖10線)過唔過得到先至可以確認係咪轉勢;就算係,都要小心恒指現時仍然靠近牛證街貨區,就算今日見到新增熊證上市,但收回價都只係落到25500至25599點;再者,小時圖DMI嘅ADX有高位回落嘅情況,意味著就算指數上行,但動力都可能欠奉。

作者阿珊,任財經/投資版傳媒人十幾年,《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證,唔貪心,志在搵餐下午茶。

Patreon:https://www.patreon.com/cbbcwar
Facebook:https://www.facebook.com/cbbcwar

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads