今朝起身睇新聞，見到噚晚美股又插過，今朝日經都唔好得去邊，再開埋個恒指牛熊證街貨圖，見到咁鬼多牛證喺度等死，心諗：今日恒指都窄窄地架啦。去到觀塘站見到恒指完U盤，先嚟跌逾300點，所以都叫定聊天室戰友，一係開市就搶熊，一係就等指數落完之後，50分鐘線(五分鐘圖 x 10線)爬到落到指數時遇阻，就先至開淡倉。喺地鐵站行緊返去新場時，抬頭一望個天開始變黑，彷彿全個世界都好鬼黑暗。
先睇返噚日隻阿里(09988)牛(52219)，噚日打緊【輪證下半Part】時都計到當時賺幅有18.3%，貪心鬼再等五分鐘圖SlowSTC(14,3)上高啲時先放。睇返噚日Patreon出文時間係下晝2點15分，其實由嗰時開始至到2點40分，五分鐘圖SlowSTC(14,3)都處於80至90幾嘅超買至嚴重超買水平，喺呢段時間(52219)可以沽走，反正阿里嗰時正股都上返$220符近(好叻架啦)。按當時(52219)高低位做過$0.178/$0.166，平均賺幅為23.3%。
依家10點2分，恒指五分鐘圖上見大裂口下跌之後一直keep住跌200幾至300零點，一早開咗淡倉嘅戰友可能要再比多少少耐性，事關恒指五分鐘圖彷彿行咗個「三角形」出嚟，50分鐘線已經由噚日收市嘅高位向下穿晒咁多條平均線去搵條指數，不過，睇到去30分鐘圖就見SlowSTC(14,3)由噚日收市時嘅超買位下行至依家嘅中軸水平，睇嚟恒指都仲有啲位向下落。
過多7分鐘，恒指忽然爆落，返去睇番五分鐘圖就見到恒指行完個「三角形」出爆落，都啱嘅，如果唔係點同個30分鐘圖交代；再遠少少換個小時圖出嚟，就見到指數噚日作勢上破保歷加通道中軸，當然不果仲要變成阻力，SlowSTC(14,3)水平雖然唔係高，但轉勢呢個signal+整條保歷加通道都向下運行。
睇返目前市場上最貼價嘅恒指熊同現價 都有近500點差距，但街貨好鬼多，退後幾步揀隻恒指熊(60401)，收回價28518點，同現價有逾500點差距，低街貨兼成交活躍，29倍槓桿都算係喺貼價熊+低街貨堆嚟講唔錯架啦。
一如以往，等SlowSTC(14,3)上返去超買先至再出手；喺等緊嘅期間可以開馬會隻app，聽晚凌晨曼聯對利物浦重賽，我買曼聯因為我家老爺捧利物浦，又測試下我有幾燈先。
仍然跟進一下隻恒指Put(22380)。喺恒指周線圖上仍然見到指數受制於10及20周線，SlowSTC(14,3)下行之勢未見異樣，我都好耐未試過揸隻輪揸咁鬼耐，只係希望佢可以繼續儲肥。
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
Patreon：https://www.patreon.com/cbbcwar
秒投輪證教室：https://bit.ly/31HG6AN
