早一個月的確忙到爆廠，知情人士或者心水清嘅你都可能會估到，無錯，上星期我離開咗一個我工作咗八年嘅地方，所以忙住交接同交代。下個星期先會迎接新嘅開始，今個星期稍作休息(放心，現有嘅一切照舊，多謝新老細)，而我發覺平時鬧鐘響三次+我家老爺剷我起身先識醒，但係今朝我喺起身等電話熄個鬧鐘。
上個星期五(4月23日)喺下半場手多落咗注好倉，本以為等到天昏地暗，結果恒指喺3點鐘到忽然瞓醒，指數回升至3點20分開始喺五分鐘圖上見到SlowSTC(14,3)出現超買再超買，之後更愈升愈有，係逃生門定係見曙光？我見聊天室戰友都話有幾格執，就當係Happy Friday嘅彩蛋啦。
依家9點40分，喺屋企死都要開住睇返平時睇開嗰個財經台，見到恒指開市微升27點後，喺五分鐘圖上見到恒指開市後見嚟個高位「長十字星」，再嚟多支「大陰燭」，SlwoSTC(14,3)勢頭都向下，已同聊天室戰友們講定聲可以嚟一注快閃淡倉。再去到9點45分，恒指已經火速落到保歷加通道中軸再次抽返起，快閃黨第一注有著落。
返去睇返恒指日線圖，依家9點57分，日線圖上見恒指以暫時高位29238點計，都叫做升穿50天線(29172點)，同時SlowSTC(14,3)喺上星期由超買位落到中軸水平後，今日回升走勢更加明顯，日線圖上其實可以畫到幾個三角形，但爆嚟爆去都仲未爆到一個似樣嘅位，原因在於指數仍受制於保歷加通道頂部。
「咁呢個位點樣先可以破到呀？」技術上只有保歷加通道口拓闊先至可以破得到位再向上；按目前恒指位置同熊證街貨咁近，4月又得返一個星期；再睇埋騰訊(00700)日線圖走勢，咦？喺100天線同150天線之間生緊個「雙底」又有可能會變成「塔形底」嘅物體，SlowSTC(14,3)都紗埋上去，唔通「騰指」都真係有機會破到位？
恒指Call(13136)，行使價29700點，有約1.8%價外，成交活躍中期Call；騰訊Call(19263)，行使價$638.5，同現價有約0.4%價外，引伸適中、槓桿偏高。
無論邊隻都好，一如以往吼五分鐘圖見SlowSTC(14,3)回落到超賣位時先好入場。
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
MeWe/Patreon/FB/IG：輪證贏家
秒投聊天室：輪證教室
