公司個格局係：我每朝斟水都會經過報紙架，的確我仲係會拎住份實體報紙睇報紙嘅人。今日斟完水路過見到份報紙A1「妻直播滾水淥仔女」，順手就拎咗返位同同事分享，除咗「恐怖」同「變態」之外，我詞窮了。
噚日恒指嚟個「V彈」咁滯，朝早嗰轉先用咗隻恒指熊(51597)捉落，到下半場接近完結時，見恒指喺五分鐘圖先後上破50分鐘線(五分鐘圖 X 10線)同100分鐘線(五分鐘圖 X 20線)，做開day trade嘅見到呢個情況，淡倉都理應先走為上；再喺下半場見恒指五分鐘圖一直都係沿住50分鐘線而上，追好倉都應一如以往等指數稍為回落至50分鐘線時趁機入場。
由於噚日較晏上稿嘅關係，以Patreon出文(噚日下午3點6分)計，基本上都係得出文嗰一刻嘅五分鐘，同埋臨收市前10分鐘先見到呢個入市嘅條件，按呢兩段時間恒指牛(66022)高位低分別做過$0.047/$0.043，同埋$0.045/$0.042，平均買入價分別為$0.045同$0.0435，為方便計算，將呢兩個平均價再計出一個平均數$0.04425作為終極平均買入價。
坦白講，呢啲時間落得場嘅都真係預咗過夜，而今朝恒指只係輕微高開34點，開市報28827點。開市後恒指走勢反覆，開保歷加通道出嚟就見到根本通道都無拓闊到，所以呢個時間只能用SlowSTC(14,3)量度，喺今朝9點40分見到SlwoSTC(14,3)兩線上到超買水平後，於9點45分已經再次下行，喺呢段時間沽走(66022)的話，以其高低位$0.055/$0.045，平均沽貨價為$0.05，一計之下過夜貨有13%賺幅，算唔算好？一般嚟計唔算，但今日個市咁樣開法，只能夠話好過無。
至依家10點38分，浮浮沉沉恒指跌0.95點，做緊28792.19點；平時都唔會出埋小數點後兩個位，但實在無辦法，個市就係咁悶，睇嚟今日都係休息一日，睇下新聞算啦。
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
MeWe/Patreon/FB/IG：輪證贏家
秒投聊天室：輪證教室
