熱門:

2021年4月13日 港股直擊 即巿股評

【盤房來料】科技股勢仍弱 欠北水支持暫無運行

隔晚美股抖氣,反而港股今日反彈,可見港股跟美股嘅相互關係再進一步退減。港股今日能夠反彈,多得內地股市喺尋日急跌後今日反彈,港股亦隨之反彈近1%。恒指高開104點報28557點,已經係半日低位,其後升幅擴大,成功收復10日線(現處28613)及20日線(現處28668),一度升423點,見28877點,可惜未能企穩28800點。中午收市前升幅收窄,恒指中午報收28727點,升274點;國指報收10943點,升68點;恒科指報收8143點,跌25點。

藍籌股個別發展,友邦(01299)半日升3.7%,成為主要撐起恒指嘅力量,大笨象(00005)亦幫手做啦啦隊,半日升1.3%,內銀股則由建行(00939)做代表,半日升2%。阿里(09988)被罰款後反而一天光晒咁款,半日再升1.6%,但留意245元阻力唔細,過唔到又係繼續玩上落,只係移動區間上移至225-245,自己睇位炒上落。美團(03690)ccass見異動,有消息指有主要股東減持,半日股價顯著下跌3.6%,係表現最差藍籌股,留意280元水平有否支持,上次低位278左右,失守或有機下試260元。科技股勢頭仍弱,稍有利淡消息即插到七彩,睇嚟喺缺乏新嘅北水流入下,科技股短期仍無運行。

港府有意逐步放寛防疫措施,內地人下月起可透過來港易計劃,來港旅遊免隔離檢疫,帶動零售股及收租股做好。周大福(01929)內地業務銷售大增,盤中創上市後新高,半日則升2.5%;六福(00590)跟周生生(00116)半日分別升7.2%;其他零售股莎莎(00178)跟利福(01212)亦有買盤追捧。收租股以九置(01997)升5%最勁,集團旗下港島區及尖沙咀商場,一直為內地客熱捧購物點,內地客恢復來港旅遊,九置當然受惠。其他本地地產股亦有進帳,但阿Man唔建議追貨,有貨就唔急住落車,可以睇多陣。

體品股再獲資金追捧,阿Man一向睇好一對龍頭安踏(02020)及李寧(02331),兩者在國內均被熱捧,半日再升3.6及1.8%。不過今日二線體品股表現更出色,特步(01368)跟中國動向(03818)半日升8.3%及5.4%,一向講晒追落後,但阿Man就寧願等龍頭回吐再考慮,都唔會高追二線股。鋼鐵股經一輪急升後,今日終回落,但相對呢期升幅,鋼鐵股回吐壓力有限,睇嚟呢個板塊尚未玩完,觀察調整期間整固夠唔夠穩,可能要搵位上車。

麥狄文
(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads