噚日隻恒指熊(50463)即開即食，唔過夜兼大約一小時嘅持貨後，平均賺幅有6.1%，雖然唔係一個好理想、好誇張嘅成績，但密食當三番，都唔錯呀！
今朝早恒指開市升百零點，報28557點，呢口價開得真係有啲麻煩，事關今朝早U盤前喺聊天室同戰友們睇牛熊證街貨圖時，以牛熊兩邊最貼價層28800至28899點，同28200至28299點，計個中位數:(28800+28299)/2=28549.5點，同開市價只係相差7.5點，根本就同企係正中間分別不大。
如果硬要秤牛熊街貨的話，以最近嗰三層計，牛證嗰邊基本上每一層嘅街貨都多過熊證嗰邊，不過，依家呢啲都無乜用，事關有印象的話，之前都試過就算恒指企近某一邊嘅門口which is係有街貨有肉食，但都係可以扭軚反方向而行。
依家10點20分，親愛嘅Product Manager未返，又無message返嚟，有啲擔心添。見到恒指上到28787點，升334點，五分鐘圖上見到恒指今朝裂口高開後，喺高位出咗粒似疑「十字星」(燭身太肥所以只能用「疑似」)後回落，心急地講咗可能反手，但安全嘅應該穿埋條50分鐘線(五分鐘圖 X 10線)先至出熊，結果依家恒指沿住50分鐘線再次上行， SlowSTC(14,3)，慶幸喺我要搵PM同事問嘢之前有同聊天室嘅大家講：「留心如果指數唔過10SMA(即50分鐘線)，出咗小注熊試水溫嘅可能要宣告失敗；無貨者如見10MA有支持踩住去，可以出動牛證」仲重新揀過牛熊比大家備用。
話分兩頭，今朝都有用小時圖睇過恒指走勢，以小時圖SlowSTC(14,3)今朝隨大市回升上行並挑戰保歷加通道中軸，都真係有講定以呢個圖嚟trade嘅話就開定好倉，同時望實條保歷加通道中軸；到依家10點29分，小時圖出咗第二粒燭，已經完全收復於保歷加通道之上，而SlowSTC(14,3)亦keep住上行，由此前嘅超賣向中軸方向出發。
恒指牛(61877)，收回價28200點，同現價有約56口差距，都有約56.4倍槓桿，適合Day Trade用，待恒指五分鐘圖稍回到50分鐘線或100分鐘線(五分鐘圖 X 20線)時先好落場。
親愛嘅PM終於返到公司啦，的確有嘢要搵佢，睥到電視機依家升4XX點啦，唔阻大家搵食啦。
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
MeWe/Patreon/FB/IG：輪證贏家
秒投聊天室：輪證教室
