熱門:

2021年4月12日 港股直擊 即巿股評

【輪證贏家】出恒指熊記得睇保歷加通道口

依家10點4分,有啲Surprise公司個Designer妹妹家陣差唔多食完佢份早餐,事關今日佢同我同一班巴士返工,搞咩咁神心呢?

Anyway,大家關心嘅應該係星期六(4月10日)出咗單同阿里巴巴(09988)有關嘅新聞:市場監管總局依法對阿里巴巴集團,在中國境內網絡零售平台壟斷行為,作出行政處罰。當局責令阿里巴巴集團停止違法行為,並罰款182.28億元人民幣,集團需連續三年提交自查合規報告。

呢個消息出咗無耐,阿里即時仆出嚟跪:「阿里巴巴表示對處罰誠懇接受,堅決服從」見到個message時,同婆婆打緊牌嘅我心諗:乜你可以唔服從咩?180幾億人仔,對你嚟講買對鞋咋?嘥氣...

今朝早未開市前同聊天室戰友們睇返個恒指牛熊證街貨圖,見到牛證增加咗一層,最貼價層上移至28600至28699點,而恒指以上星期五(9日)收市價28698點計係企咗喺呢一層嘅新增牛證街貨層裡面。再睇埋牛熊兩邊街貨分布,其實都好平均,最貼價層都係100張期指都無,第二層就有500幾張,到之後每層平均都有200至300幾張,再計過牛熊證街貨中間位為28899.5點,同上星期五收市價比有逾200點差距,以今時今日嘅恒指彈力,嗰200幾點同噚晚Suzuki喺《最後一屆口罩小姐選舉》裡面打個側手翻落台咁Easy真係無分別。

不過,指數往往都係取易不易難,佢又唔係要表現,喺搵食嘅時候咩事要打側手翻先?反正恒指今朝都高開低走,Day Trader用五分鐘圖開淡倉如同汽車維修員有個士巴拿喺身係一樣咁合情合理。

依家10點23分,聊天室裡面有幾多戰友仲揸住今朝開嘅淡倉我就真係唔知,我只係知道已經keep住叫佢哋hold住,一日唔集齊兩個印花,一日都唔好出反手住:五分鐘圖見保歷加通道口收窄;SlowSTC(14,3)數值低位回升確認。

恒指熊(50463),收回價29200點,同現價有近560點差距,27倍槓桿適合DT,換股比率10000,所以證價已經咗一毫子,等50分鐘線(五分鐘圖 X 10線)落到指數附近,如果成為咗指數嘅阻力位嘅話,就可以將(50463)小注落場,記住留意保歷加通道口有無拓闊,keep住拓闊=比位恒指行,咁呢個方法先至work架。(有關保歷加通道口拓闊問題,請自己search返上個星期嘅【輪證贏家】同【輪證下半Part】,Patreon有)

作者阿珊,任財經/投資版傳媒人十幾年,《鐘擺戰略贏港股》及《輪證基礎筆記》作者。用技術分析專心玩輪證,唔貪心,志在搵餐下午茶。

MeWe/Patreon/FB/IG:輪證贏家
秒投聊天室:輪證教室

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads