噚日快手食咗一趟滙控(00005)牛仔之後，喺下半場都無乜動作，只係睇望住個市同滙控股價碌返落去，並且諗定今日港交所(00388)點捉；坦白講我連聽日出業績嘅銀娛(00027)都已經準備好，誰不知澳門政府公布當地民居可以接種疫苗之後，濠賭股Boom一聲全部彈起，咁唔駛玩啦！
依家9點55分，恒指今早開升70點後，一度見倒跌，又一度見升幅擴闊。拆五分鐘圖業績就會見到恒指保歷加通道異常地窄，開市時SlowSTC(14,3)亦處於中軸水平，由於實在唔知「阿市想點」嘅情況之下，所以到依家都仲未喺聊天室正式出到恒指〈追揸沽策略〉，目前只能喺9點45分時提過一下出平保(02318)淡倉，就連港交所今朝啲指標都處中軸位置，到依家9點58分見下行，或者叫做有方向掛；更大嘅可能係11點出《財政預算案》。
唔理港交所先，先睇恒指牛熊證街貨圖，今日見有熊證有兩層新增街貨，最貼價層落到30900至30999點，呢度有相當於32張期指；熊證叫做有啲貨、有啲睇頭嘅應該要計到31100至31199點，呢度有相當於624張期指。
至於牛證方面，第一層30100至30199點有相當於15張期指；不過，喺30000至30099點就有成647張期指，其實呢個數量同熊證第三層嘅差唔多，而再計牛熊中間價(30900+30199)/2=30549.5點，截至依家10點15分，指指波幅為30467至30792，就係喺呢估中間位上上落落，零方向真係好難搞。
再望返隻港交所，依家10點16分見跌1.8%或$10，做緊$548，五分鐘圖上見股價今朝高開後二話不說向下走，保歷加通道都幫佢一把，通道口由今朝10點到一直拓闊至今，不過，SlowSTC(14,3)就由接近超買水平回落到嚴重超賣位置，炒唔炒業績都好，呢啲位一旦見SlowSTC(14,3)出現低位回升並得到確認的話，港交牛(53945)，收回價$515，同現價有逾6.6%差距，逾13倍槓桿Day trade用最好不過，只係要小心恒指喺今朝扭擰完一輪之後終於確實下行，依家10點29分跌逾200點，五分鐘圖上不但要留意SlowSTC(14,3)走勢，同時都要留意保歷加通道口拓闊與否。
哼，今朝嘅〈追揸沽策略〉反而係平保淡倉最成功，呢鋪真係無心插柳。
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
MeWe/Patreon/FB/IG：輪證贏家
秒投聊天室：輪證教室
