噚日捉到轉角,仲有係喺朝早已經完成整套動作;lunch time同同事阿Jo出去食飯之後,行咗去759(00759)買咗個老kit朱古力盲盒獎勵自己,最後同事阿Jo都買咗一盒,今朝先開,抽中新世紀福音戰士明日香 x Hello Kitty,同早排我家老爺幫我抽中綾波麗嘅Cross Over唔覺意一套咗,成套22+1隻特別版依家慢慢抽咗三隻,真係有排玩。
依家10點2分,恒指今早再次低開百幾點,到正式開市後一度跌逾200點,不過喺五分鐘圖上見SlowSTC(14,3)喺超賣位回升,唔難預計恒指會由低位高走返上去,只不過係喺五分鐘圖上50分鐘線(5 x 10線)同100分鐘線(5 x 20線)會唔會好似噚日咁,成為恒指即市阻力啫。
望望牛熊證街貨圖,由於噚日恒指掛住跌,所以就算前日恒指踩入過31100至31199點嘅範圍都好,至今呢層仲係絲毫無損,呢度仲多咗當於23張期指街貨,估計呢班都係打算小注博貼價取其極高槓桿,只要今朝稍為回落就可以即時收割,有咩事呢一注全數打靶亦都輸得起,絕對係腦輕鬆嘅策略。
至於牛證方面,今日見有一層新街貨層,最貼價上移至30100至30199點,呢層都唔弱,有相當於540張期指街貨。喺第二層,即30000至30099仲激,有成989張期指,為牛證重貨區。今日恒指再跌,估計呢個30000點大位各路好友都認為唔會失嘅情況之下,聽日一返嚟應該會見到築城築得更堅固,即係恒指向下殺嘅誘引亦愈嚟愈強。
「如是者恒指會唔會繼續下行殺預測嘅重貨牛架?」機會好高,事關日線圖上已經幫咗一把,見SlowSTC(14,3)已由高位向下明顯回落,今日雖然都有一個小裂口出現,但走勢上其實係補緊星期二(2月16日)嘅上升裂口(30184點至30497點)。
依家10點53分,剛剛講完個電話再睇返恒指全日低位30144點,已經到咗前文所講嘅裂口低部,10天線(29999點)剛好一點殺盡30000至30099點重貨牛,恒指熊(63957),收回價31050點,同現價有940點差距,逾37倍槓桿,進取嘅就吼恒指五分鐘圖如果上破唔到50分鐘線或100分鐘線時小注出動。
題外話,有入去秒投聊天室度八掛下,甚至課金的話,先多謝各路英雄咁比面先(你肯入嚟觀戰我都當我贏架啦),但礙於工作關係,聊天室將會服務至今年9月初,之後會唔會再復恢或者以另一個形式再出現?坦白講大半年後嘅事就到時事算,至少由依家至9月初大家都仍然可以入嚟觀戰,甚至參戰,有咩事要搵我都唔難,Patreon、MeWe、Facebook同IG都可以搵到【輪證贏家】,多謝支持。
作者阿珊,任財經/投資版傳媒人十幾年,《鐘擺戰略贏港股》及《輪證基礎筆記》作者。用技術分析專心玩輪證,唔貪心,志在搵餐下午茶。
MeWe/Patreon/FB/IG:輪證贏家
秒投聊天室:輪證教室