今朝早仲喺張床度啱啱瞓醒時睇下個電話，嘩！咁多message嘅，哦~原來隔晚美股跌咗600幾點，五連跌之餘仲係三個月來最大嘅單日跌幅，標指同納指都跌逾2%，連帶今朝起身後見到日經都跌成400幾點；咁港股呢？開市跌382點，報28914點，最低見過 28788點，首四層牛證街貨全數死亡，呢度有相當於1976張期指，當然包括咗重貨區嘅28800至28899點啦。
恒指食飽起身，但可惜爬返上29000點以上之後，喺五分鐘圖見到50分鐘線(5 x 10線)已經遇到阻力，恒指再次調頭回落。及至依家10點19分，聊天室戰友們已經先牛後熊咁食咗兩轉，再等嘅就係睇住恒指五分鐘圖條50分鐘線會唔會成為第二次阻力，將恒指再次向下啪落去。
喺日線圖上，恒指噚日收市低於10天線以下水平，今日進 一步下挫，至接近20天線(28630點)。還記得早一排有講過恒指出咗四個裂口，符合咗「裂口理論」嘅條件嗎？最近嘅一個裂口喺上周二(1月19日)出現，裂口範圍介乎28864至29100點。而今日恒指最高位暫時(截至10點26分止)為29191點，剛好以1點之差高於1月19日嘅裂口範圍頂部；至目前恒指低位為28788點，低於1月19日嘅裂口範圍底部，換言之，1月19日嘅裂口已經補完；至於下一個裂口就要數返落去上年12月30日，裂口範圍介乎26618至26670點，「唔係呀化？」唔係，睇住條20天線先啦，反正騰訊(00700)日線圖都踩返落去10天線($689.4)囉，呢騰訊呢個走勢早排指佢嗰粒「身懷六甲」都已經可以確認，開佢淡倉唔係唔得，小心日線條10天線做成支持。
恒指熊(57762)，收回價29508點，同現價有逾500點差距，用嚟捉day trade的話，進取少少試下恒指五分鐘圖上見到彈上50分鐘線時小注一試；以升穿五分鐘圖嘅100分鐘線(5 x 20線)為止蝕。
至於點解唔用日線再出淡倉沽佢落去，你睇下小時圖就會明白架啦。
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
MeWe/Patreon/FB/IG：輪證贏家
秒投聊天室：輪證教室
